काठमाडौं । नर्थ लन्डन डर्बीमा टोटनहमलाई २–१ ले पराजित गर्दै आर्सनलले लिग लिडर लिभरपूलसँगको दूरी चार अंकमा सीमित गरेको छ । सुरूआती अग्रता जोगाउन नसक्नु र आत्मघाती गोल गर्नु टोटनहमको हारको कारण बन्यो ।
एमिरेट्स स्टेडियममा खेलको २५औं मिनेटमा सन ह्युङ–मिनले गोल गर्दै भ्रमण टोली टोटनहमलाई अग्रता दिलाएका थिए । तर ४०औं मिनेटमा डोमिनिक सोलाङ्केले आत्मघाती गोल गरेपछि आर्सनलले उपहार गोल मार्फत खेल बराबरी गर्यो । लिन्ड्रो ट्रोसार्डले ४४औं मिनेटमा गोल गर्दै आर्सनललाई २–१ ले अघि बढाए । त्यसपछि दुबै टिमबाट थप गोल हुन सकेन र आर्सनल २–१ ले विजयी भयो ।
प्रिमियर लिगमै सेप्टेम्बरमा भएको खेलमा आर्सनलले टोटनहमलाई १–० ले हराएको थियो । योसँगै यस सिजनका दुबै लिग खेलमा आर्सनलले टोटनहमलाई पराजित गरेको छ ।
जितसँगै २१ खेलमा १२ जित र २ हार सहित ४३ अंक जोडेको आर्सनलले शीर्ष स्थानको लिभरपूलसँगको दूरी चार अंकमा सीमित गरेको छ । एक खेल कम खेलेको लिभरपूलको ४३ अंक छ । २१ खेलमा ७ जित हात पारेको टोटनहम २४ अंकका साथ १३औं स्थानमा छ ।
