काठमाडौं । नेपाली पुरूष टिम, खो खो विश्वकप २०२५ को क्वाटरफाइनलमा प्रवेश गरेको छ ।
भारतको राजधानी नयाँदिल्लीस्थित इन्दिरा गान्धी इन्डोर स्टेडियममा भुटानलाई हराउँदै नेपाल अन्तिम ८ मा प्रवेश गरेको हो ।
समूह ए अन्तर्गत आज सम्पन्न खेलमा नेपालले भुटानलाई ९८-८ अंकको अन्तरले हराएको हो । चारवटै टर्नमा सानदार प्रदर्शन गरेको नेपालले भुटानविरुद्ध प्रभावशाली प्रदर्शन गरेको थियो ।
समूह चरणको आफ्नो अन्तिम खेलमा भुटानलाई पराजित गरेसँगै नेपाल ४ खेलमा ३ जित र १ हारसहित ६ अंक जोडेर दोस्रो स्थानमा छ । बुधबार भएको खेलमा नेपालले ब्राजिललाई १३४-८ को फराकिलो अन्तरले हराएको थियो । पहिलो खेलमा भारतसँग पराजित भएको नेपालले दोस्रो खेलमा पेरूलाई पराजित गरेको थियो ।
महिलातर्फ लगातार तीन खेल जित्दै नेपालले यसअघिनै क्वाटरफाइनलमा प्रवेश गरिसकेको छ । समूह सीमा रहेको महिला टोली ३ खेलमा ३ जितसहित ६ अंक जोडेर शीर्ष स्थानमा छ । नेपालले आजै बंगलादेशसँग खेल्ने तालिका छ ।
