काठमाडौं । जय ट्रफी पुरुष एलिट कपको उपाधिका लागि आज नेपाल पुलिस क्लब र त्रिभुवन आर्मी क्लब प्रतिस्पर्धा गर्दै छन् । नारायणी क्रिकेट रंगशाला वीरगन्जमा खेल बिहान साढे ९ बजे सुरूबाट हुनेछ ।
लिग चरणका खेलहरू दुई दिवसीय भए पनि फाइनल खेल भने तीन दिवसीय खेलिनेछ । लिग चरणमा पहिलो इनिङ्समा टिमले अधिकतम ६० ओभर ब्याटिङका लागि प्रदान गरिएको थियो भने फाइनलमा एक टिमले पहिलो इनिङ्समा ८० ओभर पाउनेछ । दोस्रो इनिङ्समा भने ओभरको कुनै सीमा तोकिएको छैन ।
प्रतियोगितामा पुलिसको यो लगातार दोस्रो जित हो । यसअघि आर्मीसँग बराबरी खेलेको पुलिसले मधेश प्रदेशलाई हराएको थियो । यता बागमतीको यो पहिलो हार हो । यसअघि बागमतीले मधेश र आर्मीसँग बराबरी खेलेको थियो ।
पुलिसका अमित श्रेष्ठले ५ इनिङ्समा २२४ रन बनाएका छन् । उनी सर्वाधिक रन बनाउने खेलाडीको दोस्रो स्थानमा छन् । पुलिसकै अर्जुन साउदले १३८ रन बनाएका छन् । आर्मीका लागी बसिर अहमद र इमरान सेखले समान १३७ रन बनाएका छन् । बलिङमा २१ विकेट सहित आर्मीका सहाव आलम शीर्ष स्थानमा छ । दोस्रो स्थानमा रहेका पुलिसका ललित राजवंशीले १९ विकेट हात पारेका छन् ।
पुलिस ३ खेलमा २ जित र १ बराबरी सहित ६६ अंक जोडेर शीर्ष स्थानमा फाइनलमा प्रवेश गरेको हो । आर्मीले ३ मध्ये १ जित र २ खेलमा बाराबरी नतिजा हात पारेको थियो । बागमती प्रदेश र मधेश प्रदेश जितविहीन बन्दै प्रतियोगिताबाट बाहिरिएका थिए ।
