काठमाडौं । नेपाल कबड्डी लिग-एनकेएलको खेल तालिका सार्वजनिक भएको छ । आयोजक नेपाल कबड्डी संघले शुक्रबार राति सार्वजनिक गरेको खेल तालिकामा माघ ४ गते हुने उद्घाटन खेलमा काठमान्डु माभरिक्स र पोखरा लेकर्स भिड्ने छन् ।
एनकेएलको पहिलो सिजन फ्रेन्चाइज टिमको अवधारणमा ६ सहरका ६ टिमले प्रतिस्पर्धा गर्दैछन् । विराटनगरले पहिलो खेलमा धनगढी वाइल्डक्याट्सको सामना गर्नेछ । जनकपुर नाइट्सले बुटवलको हिमालयन रेइडर्सविरुद्ध प्रतिस्पर्धा गर्दै एनकेएलमा डेब्यु गर्नेछ ।
राउन्ड रोबिन लिगमा १५ खेल हुनेछ, जसका शीर्ष चार टिम नकआउट चरणमा प्रवेश गर्नेछन् । लिगका शीर्ष दुई टिमले माघ १४ गते क्वालिफाइर १ खेल्नेछ, जसको विजेता सीधै फाइनलमा पुग्नेछ । लिगमा तेस्रो र चौथो स्थानमा रहेका टिमले माघ १४ गते नै इलिमिनेटरमा खेल्नेछ, जसको विजेता क्वालिफाइर २ मा पुग्नेछ । पहिलो क्वालिफाइरमा पराजित भएका टिम र इलिमिनेटरका विजेतावीच माघ १६ गते हुने क्वलिफाइर २ मा जित हासिल गर्ने टिमले फाइनलमा स्थान पाउनेछ । फाइनल माघ १८ गते हुनेछ ।
राष्ट्रिय खेलकुद परिषद्को त्रिपुरेश्वरस्थित कभर्डहलमा माघ १८ गतेसम्म सञ्चालन हुने एनकेएलमा दैनिक एक अथवा दुई खेल सञ्चालन गरिनेछ । दुई खेल हुँदा दिनको पहिलो खेल साँझ साढे ५ बजे र दोस्रो खेल साढे ६ बजे सुरु हुनेछ । एक खेलमात्रै भएको दिन प्रतिस्पर्धा प्रारम्भ हुने समय साँझ साढे ६ बजे तोकिएको छ ।
