काठमाडौं । काभा पुरुष भलिबल क्लब च्याम्पियनसिपको प्रत्यक्ष प्रसारण कान्तिपुर म्याक्स एचडीले गर्ने भएको छ ।
मंसिर २२ देखि २९ गते सम्म त्रिपुरेश्वरस्थित राष्ट्रिय खेलकुद परिषद् (राखेप) को कवर्डमा हुने च्याम्पियनसिपको प्रत्यक्ष प्रसारण कान्तिपुर म्याक्सबाट हुने भएको हो ।
च्याम्पियन्सिपको ब्रोडकास्टिङ पार्टनर हाम्रो खेलकुद र कान्तिपुर म्याक्स बीच टेलिभिजन प्रसारणका लागी सम्झैतामा हस्ताक्षर भएको हो । सम्झौता पत्रमा कान्तिपुर टेलिभिजनका प्रमुख कार्यकारी अधिकृत शिशिर पछाई र हाम्रो खेलकुदका सम्पादक प्रकाश तिमल्सिनाले हस्ताक्षर गर्नुभएको हो ।
यससँगै प्रतियोगिता हाम्रो खेलकुदको युट्युब र टेलिभिजनमा कान्तिपुर म्याक्समा प्रत्यक्ष प्रसारण हुनेछ । च्याम्पियनसिपमा नेपालका २, भारत, माल्दिभ्स र इरानका १-१ गरी कुल ५ क्लबको सहभागिता रहने छ । नेपालको तर्फबाट आठौं प्रधानमन्त्री कप एनभिए लिगको विजेता टिप टप हेल्प नेपाल र उपविजेता गण्डकी प्रदेश सँगै भारतको क्यालिकट, माल्दिभ्सका एचडिसी क्लब र इरानको चादौरा मालो क्लबले च्याम्पियनसिपमा सहभागिता जनाउने छन् ।
सिंगल राउन्ड रोविन लिगका आधारमा खेलिने प्रतियोगितामा सेमिफाइनल, तेस्रो स्थान र फाइनल सहित कुल १४ खेल हुनेछन् ।
.png&w=350&height=150)