काठमाडौं । ललित स्मृति एन्फा अन्डर १८ युथ लिगमा संकटा अन्डर १८ टिमले नेपाल पुलिस क्लबको युवा टोलीलाई पराजित गरेको छ ।
एन्फा कम्प्लेक्समै भएको खेलमा संकटाले २-० को जितसहित ३ अंक सुरक्षित गरेको हो । लिग लिडर पुलिसलाई पराजित गरेसँगै संकटा तालिकाको तेस्रो स्थानमा उक्लिएको छ ।
अजय महर्जनको टिमका लागी दुवै गोल सविनकुमार लुंगेली मगरले गरे । पहिलो हाफको अतिरिक्त सयमा संकटाले सुरुवाती अग्रता लियो । संकटाका लागि सविनले गोल गरेपछि भोलानाथ सिलवालको टोली पुलिस पहिलो हाफमा १-० ले पछि पर्यो ।
दोस्रो हाफको अतिरिक्त समयको सातौं मिनेटमा सविनले नै व्यक्तिगत दोस्रो गोल गरे । सोलो मुभमा सविनले लामो दुरीबाट गरेको अकर्षक प्रहारले जाली चुमेपछि संकटाले २-० गोल अन्तरको जित हात पर्यो ।
यो जितसँगै संकटाले ३ अंक जोडेको छ । १३ खेलमा ७ जितसहित २४ अंक जोडेको संकटा तालिकाको तेस्रो स्थानमा उक्लिएको छ । समान खेलमा २६ अंकसहित पुलिस शीर्ष स्थानमा यथावत छ ।
