काठमाडौं । अल-हिलाल साउदी प्रो लिगको शीर्ष स्थानमा फर्किएको छ । गएराति सप्पन्न खेलमा अल-इत्तिफाकलाई पराजित गर्दै अल-हिलाल पुन लिगको शीर्ष स्थानमा फर्किएको हो ।
अल-इत्तिफाकलाई ३-१ ले पराजित गरेको अल-हिलालले जारी सिजनमा कुनै खेल हारेको छैन । सर्बियन स्ट्राइकर एलेक्सान्डर मिट्रोभिकले पहिलो हाफको अतिरिक्त समयमा लेफ्ट-फुट फिनिशले जाली चुमेपछि अल-हिलालले सुरुवाती अग्रता बनायो । ८१ औं मिनेटमा माल्कमले दोस्रो गोल गरेपछि अल-हिलालले २-० ले अघि रह्यो ।
इन्जुरी टाइमको चौथो मिनेटमा भिटिन्होले गोल गरेपछि अल-इत्तिफाकले पुनरागमनको प्रयास गर्यो । लगत्तै मोहम्मद अल काहतानीले गोल गर्दै अल-हिलालको जित सुनिश्चित गरे । खेलको अन्तिम सयममा अल-इत्तिफाकका अब्दुल्लाह रादिफलाई रातो कार्ड देखाइयो ।
जितसँगै साउदी प्रो लिगमा १० खेलमा ९ जित र १ बराबरी सहित कुल २८ अंक जोडेको अल-हिलाल शीर्ष स्थानमा उक्लिएको छ । २७ अंक जोडेको अल-इत्तिहादको दोस्रो र ११ अंकसहित अल-इत्तिफाक ११ औं स्थानमा छ ।
