काठमाडौं । साफ महिला च्याम्पियनसिपमा सहभागी हुन श्रीलंङ्काको टोली काठमाडौं आइपुगेको छ । श्रीलंकाको टोलीलाई त्रिभुवन विमानस्थलमा अखिल नेपाल फुटबल संघ एन्फाका प्रवक्ता सुरेश साह लगायतका पदाधिकारीले स्वागत गरे ।
प्रतियोगिता आगामी बिहीबारबाट सुरु हुँदैछ । श्रीलङ्का, नेपाल रहेको समूह बीमा छ । माल्दिभ्स र भुटान पनि यसै समूहमा छन् । श्रीलङ्काले आफ्नो पहिलो खेल शुक्रबार माल्दिभ्ससँग खेल्नेछ ।
समूहको अन्तिम खेलमा श्रीलङ्काले कात्तिक ८ गते नेपालसँग प्रतिस्पर्धा गर्नेछ । तुसानी मधुसिकाको कप्तानीमा रहेको २३ सदस्य श्रीलङ्कन टोली पहिलो पटक साफको उपाधि जित्ने लक्ष्यमा छ ।
बंगलादेश पनि आज बिहान काठमाडौं आएको हो । बंगलादेश प्रतियोगिताको साविक विजेता हो । पाकिस्तान र माल्दिभ्स यसअघि नै नेपाल आइसकेका छन् ।
