काठमाडौं । अपराजित रहँदै कर्णाली यस्वीजले पहिलो संस्करणको एभरेस्ट महिला भलिबल लिगको उपाधि जितेको छ । दशरथ रंगशालाको कभर्डहलमा गएराति भएको फाइनल खेलमा ललितपुर क्विन्सलाई ५ सेटमा हराउँदै कर्णाली च्याम्पियन बनेको हो ।
खेलको पहिलो सेट र दोस्रो सेटमा जित दर्ता गरेपछि कर्णाली २-शून्यको सहज अवस्थामा पुगेको थियो । सुरुआतबाटै अग्रता बनाएको कर्णालीले १५-११ ले अघि रहँदै पहिलो सेट २५-१७ ले आफ्नो पक्षमा पर्यो । दोस्रो सेटमा पनि कर्णालीले ललितपुरलाई हाबी हुन दिएन । उसले १६-९ को अग्रता बनाएर २५-२० को जित दर्ता गरेको हो ।
तेस्रो सेटमा भने ललितपुरले नाटकीय कमब्याक गर्यो । प्रतिस्पर्धात्मक सुरुआत भएको सेटमा ललितपुरले १५-७ र १९-९ को अग्रता बनाएको थियो । कर्णालीको कमब्याकको कुनै प्रयास सफल हुन नसकेपछि २५-१२ को फराकिलो अन्तरले पराजित हुन पुग्यो ।
चौथो सेटमा ललितपुर २५-१८ को जित निकाल्न सफल भयो । निकै प्रतिस्पर्धात्मक र रोमाञ्चक बनेको अन्तिम सेटको मध्यान्तरमा ललितपुर ८-६ ले अघि थियो । त्यसपछि ११-११ मा ललितपुरलाई भेटेको कर्णाली १५-१३ को जितसहित च्याम्पियन बनेको हो । कर्णालीले प्रतियोगिताका सबै खेलमा जित दर्ता गरेको थियो । कर्णालीमा अनुबन्ध भएका नेपाली खेलाडी कमै अनुभवी भए पनि उसले उपाधि जित्यो ।
कर्णालीले लिग चरणको खेलमा पनि ललितपुरलाई हराएको थियो । च्याम्पियन कर्णालीले नगद सात लाख र उपविजेता ललितपुरले तीन लाख पुरस्कार प्राप्त गरे । कर्णालीकी जेनेप सर्वोत्कृष्ट खेलाडी बनिन् ।
