काठमाडौं । एचटी क्यानडासँगको पहिलो अभ्यास खेलमा नेपाल पराजित भएको छ । गएराति सम्पन्न खेलमा नेपाल घरेलु टोलीसँग ३ विकेटले पराजित भएको हो ।
क्यानडामा सम्पन्न लिग टु सिरिजमा जितविहीन रहँदै केबल १ अंक जोडेको नेपाल अमेरिकामा मा हुने घरेलु टोली र स्कटल्यान्ड सम्मिलत अर्को लिग-२ को त्रिकोणात्मक सिरिजको तयारी छ । सोही सिरिजको तयारीस्वरुप खेलिएको पहिलो एकदिवसीय अभ्यास खेलमा नेपाल एचटी क्यानडासँग स्तब्ध भएको हो ।
सोमपाल कामीको कप्तानीमा टस जितेर पहिला ब्याटिङ गरेको नेपाल १० ओभर २ बल बाँकी रहँदै १ सय ४३ रनमा समेटियो । ओपनर अनिल साह र अर्जुन साउँदले पहिलो विकेटका लागि ७४ रनको साझेदारी गरे । अनिल ३४ र अर्जुन ३३ रनमा आउट भए । मिडिल अडरमा आरिफ शेखले २३ र कुशल भुर्तलले २५ रन जोड्नु बाहेक अन्य खेलाडीले दोहोरो अंकमा रन बनाउन सकेनन् ।
जवाफमा १ सय ४४ रनको सामान्य लक्ष्य घरेलु टोलीले ३६ ओभर ५ बलमा ७ विकेट गुमाएर पुरा गर्यो । उसका कप्तान शुभम शर्मा २७ रनमा आउट भए । युवराज समराले सर्वाधिक ४४ रन बनाए । गुरसाहिब सिंह १७ र ओलिभर कोक्स १६ रनमा नटआउट रहे ।
नेपाल र एचटी क्यानडाबीचको दोस्रो अभ्यास खेल आज राति र तेस्रो खेल मंगलबार खेलिनेछ ।