काठमाडौं । किंग कप अफ च्याम्पियन्सको राउन्ड अफ ३२ मा साउदी प्रो लिग क्लब अल-नासरले दोस्रो श्रेणीको अल-हाजेमलाई पराजित गरेको छ ।
किंग अब्दुल्ला स्पोर्ट्स सिटीमा अल-नासरले अल-हाजेमविरुद्ध २-१ को संघर्षपूर्ण जित हासिल गरेको हो । मुख्य प्रशिक्षकको रूपमा स्टेफानो पियोलीललाई हारबाट जोगाउन खेलको अन्तिम समयमा नवाफ बु वासलले गोल गरेका थिए ।
पहिलो हाफको इन्जुरी समयको छैटौं मिनेटमा सुल्तान अल घन्नामको क्रसमा साडियो मानेले गोल गर्दै डेडलक तोडे । ६२ औं मिनेटमा बासिल अल सायलीले गोल गरेपछि खेल १-१ को बराबरी अवस्थामा फर्कियो ।
तर अतिरिक्त समयको दोस्रो मिनेटमा नवाफ बु वासलले गोल गर्दै अल-नासरको जित सुनिश्चित गरे । यस खेलमा स्टार फरवार्ड क्रिस्टियानो रोनाल्डालाई आराम दिइएको थियो ।