काठमाडौं । एसीसी महिला एसिया कपमा पाकिस्तानले यूएईमाथि १० विकेटको जित हात पारेको छ । पाकिस्तानले टस जितेर पहिले बलिङ गर्ने निर्णय लिएको थियो ।
यूएईले २० ओभरमा ८ विकेट गुमाउँदै १ सय ८ रनको मध्यम योगफल बनायो । कप्तान इसा ओजाले १६, थ्रिथा सतिसले सर्वाधिक ४२ र खुशी शर्माले १२ रन जोडे । पाकिस्तानको कसिलो बलिङ सामु अन्य ब्याटरले दोहोरो रन बनाउन सकेनन् ।
सादिया इक्बाल, नास्रा सान्धु र तुबा हसनले दुई–दुई विकेट लिए । जवाफमा पाकिस्तानले ३५ बल बाँकी रहँदा विना क्षति लक्ष्य पूरा गर्यो । गुल फिरोजाले ६२ र मुनिबा अलीले ३७ रनको योगदान गरे । पाकिस्तानको जारी प्रतियोगितामा यो लगातार दोस्रो जित हो ।
पहिलो खेलमा भारतसँग पराजित भएको पाकिस्तानले यसअघि नेपाललाई सहजै ९ विकेटले हराएको थियो । तीन खेलबाट चार अंक जोडेको पाकिस्तान सेमिफाइनल नजिक पुगेको छ । नेपाल र भारतबीचको खेलपछि समूह ए बाट सेमिफाइनल पुग्ने टिमको टुंगो लाग्नेछ ।