काठमाडौं । नेदरल्यान्ड्स युरो कप फुटबलको क्वार्टरफाइनलमा प्रवेश गरेको छ । म्युनिखमा भएको प्रि-क्वार्टरफाइनल खेलमा रोमानियालाई ३-० गोल अन्तरले पराजित गर्दै नेदरल्यान्ड्स १६ वर्षपछि प्रतियोगिताको अन्तिम ८ मा प्रवेश गरेको हो । नेदरल्यान्ड्सको जितमा वैकल्पिक खेलाडी डोन्यल मालेनलले २ गोल गरे ।
२० औं मिनेटमा लिभरपुलका फरवार्ड कोडी गाक्पोले गोल गर्दै डच टोलीलाई सुरुवाती अग्रता दिलाए । जाभी सिमोन्सको पासमा उनले उत्कृष्ट फिनिस गरेका हुन् । खेलको ५४ औं मिनेटमा स्टिभन बर्गविजनलाई प्रतिस्थापित गर्दै मैदान प्रवेश गरेका मालेनले ८३ औं मिनेटमा गोल गरेपछि नेदरल्यान्ड्स २-० ले अघि बढ्यो । इन्ज्युरी समयको चौथो मिनेटमा मालेनले व्यक्तिगत दोस्रो गोल गरेपछि नेदरल्यान्ड्स ३-० को सहज जितसहित क्वार्टरफाइनलमा प्रवेश गर्यो ।
युरो कपकै अर्को खेलमा टर्किएले अस्ट्रियालाई २-१ गोल अन्तरले पराजित गर्दै क्वार्टरफाइनलमा नेदरल्यान्ड्सको भेट पक्का गर्यो । टर्कीएको जितमा डिफेन्डर मरिह डेमिरालले दुवै गोल गरे भने अस्ट्रियाका माइकल ग्रेगोरिस्चलले १ गोल फर्काए ।
