काठमाडौं । साबिक विजेता इटाली युरो कप २०२४ को प्रिक्वार्टरफाइनलबाटै बाहिरिएको छ । गएराति सम्पन्न खेलमा स्विट्जरल्यान्डसँग २-० गोल अन्तरले पराजित भएसँगै इटाली अन्तिम १६ बाटै बाहिरिएको हो ।
स्विट्जरल्यान्डका लागि रेमो फ्रिउलार र रुबेन भार्गासले १-१ गोल गरे ।
बर्लिन ओलम्पिक पार्कमा ३७ औं मिनेटमा भार्गासको पासमा फ्रिउलारले गोल गर्दै स्विट्जरल्यान्डलाई सुरुवाती अग्रता दिलाए । दोस्रो हाफको पहिलो मिनेटमै भार्गासले गोल गर्दै स्विट्जरल्यान्डलाई २-० को अग्रता दिलाए ।
उनले मिचेल एबिसरको पासमा बक्स भित्रबाट उत्कृष्ट फिनिस गरेका थिए । त्यसपछि दुबै टिमबाट थप गोल हुन नसकेपछि स्विट्जरल्यान्ड २-० को जित सहित अन्तिम ८ मा प्रवेश गर्यो । अब स्विट्जरल्यान्डले क्वार्टरफाइनलमा इङ्ल्यान्ड र स्लोभाकियाबीचको खेलको विजेतासँग खेल्ने छ ।