काठमाडौं । नेपाल भलिबल संघले केडिया ग्रुपको सहकार्यमा पहिलोपटक पुरुष भलिबल फ्रेन्चाइज लिग आयोजना गर्ने भएको छ ।
नेपाल भलिबल संघले काठमाडौंमा आज एक कार्यक्रम गर्दै फ्रेन्चाइजी लिगका लागि केडिया ग्रुपसँग सम्झौता गरेको हो । सम्झौतापत्रमा नेपाल भलिबल संघका अध्यक्ष जितेन्द्रबहादुर चन्द र केडिया ग्रुपका प्रबन्ध निर्देशक विमलकुमार केडियाले हस्ताक्षर गरे ।
नेपाल भलिबल संघ र केडिया ग्रुपबीच सात वर्षको सम्झौता भएको छ । लिग सम्पन्न गर्न लाग्ने सम्पूर्ण खर्च केडिया ग्रुपले बेहोर्नेछ । त्यसबाहेक नेपाल भलिबल संघलाई केडिया ग्रुपले ३५ लाख रुपैयाँ वार्षिक रुपमा सहयोग गर्ने आज अयोजित पत्रकार सम्मेलनमा संघका अध्यक्ष चन्दले बताउनुभयो ।
लिगको पहिलो संस्करण आगामी माघ, फागुनमा सुरु गर्ने लक्ष्य संघको छ । प्रतियोगिताको पहिलो संस्करण काठमाडौंमा हुनेछ भने अन्य संस्करणहरु होम एन्ड अवेका आधारमा अन्य सहरहरुमा खेलाइने संघको योजना छ ।
कार्यक्रममा केडिया ग्रुपका प्रबन्ध निर्देशक विमलकुमार केडियाले आउने दिनमा नेपालको राष्ट्रिय खेल भलिबलका कभर्डहल निर्माणका लागि सबै मिलेर सरकारलाई पहल गर्नुपर्ने बताए ।
