हेटौंडा । हेटौंडामा बुधबारबाट ‘हेटौंडा कप एसियाली खुला रेटिङ बुद्धिचाल प्रतियोगिता २०८०’ सुरु भएको छ ।
मकवानपुर जिल्ला बुद्धिचाल संघ र नेपाल खेलकुद महासंघको आयोजनामा पाँच दिनसम्म सञ्चालन हुने प्रतियोगितमा ४ देशका ८५ खेलाडीले सहभागिता जनाएका छन् । प्रतियोगितामा भारतका ५४, नेपालका २४, बंगलादेशका ६ र श्रीलंकाका एक खेलाडी सहभागी छन् ।
प्रतियोगितामा स्विस लिग प्रणालीअन्तर्गत ९ खेल खेलाइनेछ । प्रतियोगितामा प्रथम हुनेले नगद एक लाख २५ हजार रुपैयाँ, द्वितीय हुनेले ७५ हजार, तृतीय हुनेले ४० हजार रुपैयाँ प्राप्त गर्ने मकवानपुर जिल्ला बुद्धिचाल संघका अध्यक्ष मनोज श्रेष्ठले जानकारी दिए ।
यस्तै चौथो हुनेले २५ हजार, पाँचौंले २० हजार, छैटौंदेखि दशौंसम्मलाई नगद १५ हजार रुपैयाँ र एघारौंदेखि पन्ध्रौंसम्मलाई नगद ११ हजार रुपैयाँ प्रदान गरिने दिने आयोजकले जनाएको छ । बुधबारबाट सुरु भएको प्रतियोगिता मंसिर १७ गतेसम्म सञ्चालन हुनेछ ।
