काठमाडौं । अर्जेन्टिनाका फरवार्ड लियोनल मेसीले सन् २०२२ को कतार विश्वकपमा लगाएका ६ वटा जर्सीलाई अक्सनमा राखिँदैछ ।
यो महिनाको अन्तिममा बिडिङ सुरु हुनेछ । मेसीले लगाएको जर्सी, खेलकुद जगतकै सबैभन्दा मूल्यवान हुने अनुमान गरिएको छ ।
सेतो र निलो रंगको जर्सीको अक्सन नोभेम्बर ३० देखि सुरु भएर डिसेम्बर १४ मा बन्द हुनेछ । सोही बेला सर्वसाधरणका लागि जर्सीलाई प्रर्दशनीमा पनि राखिनेछ । जर्सीको संकलनले दश मिलियन डलरभन्दा बढी मूल्य पाउने विश्वास गरिएको छ ।
संकलनमा मेसीले विश्वकप फाइनलमा फ्रान्सविरुद्ध पहिलो हाफमा लगाएको जर्सी पनि समावेश छ । अक्सनबाट प्राप्त रकमको केही हिस्सा लियो मेसी फाउन्डेसनको पनि सहयोग रहेको बार्सिलोनाको बाल अस्पताललाई प्रदान गरिनेछ ।
खेलकुदको मूल्यवान वस्तुको कीर्तिमान अमेरिकाका माइकल जोर्डनको नाममा छ । उनले सन् १९९८ को एनबीए फाइनलमा लगाएको जर्सीले गत वर्ष दश दशमलव एक मलियन डलर मूल्य पाएको थियो ।