काठमाडौं । नेपाली कांग्रेसले वैशाख ४ गते संसदीय दलको नेता चयन गर्ने भएको छ ।
प्रतिनिधिसभाको पहिलो अधिवेशन सकिइसक्दा पनि दलको नेता चयन गर्न नसकेको कांग्रेसले अब भने मिति नै तोकेर नेता चयन गर्न लागेको हो । यसअघि सर्वसम्मत रूपमा दलको नेता चयन गर्ने भनेर प्रक्रिया लम्बिएको थियो । अब भने सर्वसम्मत नभए निर्वाचन गर्ने कांग्रेसको तयारी छ ।
यस्तै २ गते नै निर्वाचन पक्रिया सार्वजनिक गर्ने निर्वाचन समितिका संयोजकसमेत रहनुभएका सहमहामन्त्री प्रकाश रसाइलीले बताउनुभयो । संसदीय दलको नेताका लागि ज्येष्ठ सदस्य अर्जुननरसिंह केसीदेखि भीष्मराज आङदेम्बे, मोहन आचार्य, भरतबहादुर खड्कालगायतको दाबी छ ।
यद्यपि, पुस्तान्तरणको जनादेशका बीच युवालाई अघि सार्नुपर्ने माग पनि पार्टीभित्र बलियो बन्दै गएको छ । युवा सांसदहरू योगेश गौचन थकाली, निस्कल राई र बासना थापामध्ये एकलाई संसदीय दलको नेता बनाउनुपर्ने आवाज पार्टीभित्र छ ।
यता कांग्रेस सभापति गगन थापा र उपसभापति विश्वप्रकाश शर्माले भने पूर्वसभापति शेरबहादुर देउवा पक्षलाई मिलाउन आङदेम्बेलाई दलको नेतामा अघि सार्ने योजना बनाइरहेको नेताहरूको भनाइ छ ।
.png&w=350&height=150)
