काठमाडौं । उच्चस्तरीय जाँचबुझ आयोगले अध्यक्ष केपी शर्मा ओलीको स्थान हद फुकुवा गरेलगत्तै नेकपा (एमाले) चुनावमा होमिएको छ ।
मंगलबार बसेको केन्द्रीय सचिवालय बैठकले चुनावमा जाने औपचारिक निर्णय गरेको हो । संसद् पुनर्स्थापनाको मुद्दालाई प्रमुखताका साथ उठाएको एमालेले घोषणापत्र मस्याैदा लेखन र निर्वाचन परिचालन कमिटीसमेत बनाएको छ । सचिवालयले अध्यक्ष केपी शर्मा ओलीको संयोजकत्वमा उपाध्यक्षहरू रामबहादुर थापा, विष्णु पौडेल, महासचिव शंकर पोखरेल, नेताहरू इश्वर पोखरेल, प्रदीप ज्ञवाली र सदस्य सचिव विष्णु रिमाल रहेको चुनाव घोषणापत्र मस्यौदा समिति बनाएको छ ।
यस्तै निर्वाचन परिचालन कमिटीको संयोजकतत्वमा उपाध्यक्ष रामबहादुर थापालाई तोकिएको छ। एमालेले निर्वाचन अभियानका लागि सातै प्रदेशमा इन्चार्जसमेत तोकेको छ । बैठकमा ओलीले एकै पटक नहुन सक्ने स्थिति रहेको बिफ्रिङ गर्नुभएको थियो ।
अध्यक्ष ओलीले बाह्य रूपमा निर्वाचनको माहोल बनेको र त्यसमा तयारी गर्न नेता, कार्यकर्ताहरूलाई निर्देशन दिनुभएको थियो । तर सरकारको गतिविधि र देशमा भइरहेका घटनाले निर्वाचन हुन्छ कि हुँदैन भन्ने अन्योल सिर्जना गरेको उहाँको भनाइ थियो।
