काठमाडौं । नेपाली कांग्रेसमा आगामी पुस अन्तिम साता नियमित महाधिवेशन गर्ने गरी कार्यतालिका ल्याउने सहमति भएको छ ।
सभापति शेरबहादुर देउवासहितका पदाधिकारी र शीर्ष नेताको तीन दिनदेखि जारी छलफलमा कार्यतालिका ल्याउने सहमति भएको हो । यससँगै कांग्रेसमा डेढ महिनादेखि जारी महाधिवेशन विवाद मत्थर हुने संकेत देखिएको छ । नेताहरूबीच भएको सहमतिअनुसार भोलि बस्ने केन्द्रीय समिति बैठकमा आगामी पुस २७ देखि २९ सम्म महाधिवेशन गर्ने गरी कार्यतालिका प्रस्तुत गरिने नेता रमेश लेखकले जानकारी दिनुभयो ।
उहाँका अनुसार महाधिवेशनका लागि क्रियाशील सदस्यता, विधान मस्यौदा तथा निर्वाचन गरी तीन वटा समिति गठन गरिनेछ । समितिले काम गर्न नसके पुन: छलफल गरेर सहमतिमा महाधिवेशनको समय सार्न सकिने पनि उहाँले बताउनुभयो । प्रचार विभाग प्रमुख मीन विश्वकर्माले पनि भोलि बस्ने केन्द्रीय समिति बैठकमा उपसभापति पूर्णबहादुर खड्काले कार्यतालिका पेस गर्ने जानकारी दिनुभयो ।
आज शीर्ष नेताहरूबीच भएको छलफलमा महाधिवेशनका लागि पुसमा क्यालेन्डर निकाल्ने, महाधिवेशन तोक्ने, आवश्यक समितिहरू बनाउने तथा क्रियाशील सदस्यताको टुंगो लगाउने विषयमा छलफल भएको थियो । मुख्यसचिव कृष्णप्रसाद पौडेलले सोमबार बस्ने केन्द्रीय समिति बैठकमा कार्यतालिका लगायतका विषयमा सर्वसम्मतिले निर्णय हुने वातावरण बनेको बताउनु भएको छ ।
सभापति शेरबहादुर देउवा गत असोज २८ गते उपसभापति पूर्णबहादुर खड्कालाई कार्यवाहक जिम्मेवारी दिएर देशबाहिर जानुभएको थियो । तर फर्किँदासम्म पनि नेताहरूले सहमति जुटाउन नसकेपछि विवाद मिलाउन देउवा आफैँ सक्रिय हुनुभएको हो । देउवाले तीन दिनदेखि लगातार नेताहरूसँग छलफल गर्नुभएको थियो ।
नियमित महाधिवेशन र विशेष महाधिवेशनको विषयमा सहमित हुन नसक्दा कांग्रेसभित्र विवाद चर्किएको थियो। नेता शेखर कोइरालाले नियमित महाधिवेशनको पक्षका वकालत गर्दै आउनु भएको थियो भने महामन्त्री गगन थापाले नियमित महाधिवेशन सम्भव नभएको भन्दै विशेष महाधिवेशनको अडान राख्दै आउनुभएको थियो ।
यता ५४ प्रतिशत महाधिवेशन प्रतिनिधिले विशेष महाधिवेशनको माग गर्दै पार्टी कार्यालयमा हस्ताक्षरसमेत बुझाएका छन् । सभापति देउवा निकटकै पूर्वपदाधिकारीहरू विमलेन्द्र निधि, कृष्णप्रसाद सिटौलालगायतका नेताहरूले भने निर्वाचनको तयारीमा लाग्नुपर्ने भन्दै आगामी वैशाखमामा मात्र महाधिवेशन गर्नुपर्नेमा जोड दिँदै आएका छन् ।
यता नयाँ बानेश्वरमा बसेको देउवा निकट केन्द्रीय सदस्यहरूको भेलाले उक्त कार्यतालिका नमान्ने निर्णय गरेको छ । आफूसँग छलफल नगरेको र विशेष महाधिवेशनका लागि गरिएको हस्ताक्षर फिर्ता नगरी असम्भव कार्यतालिका ल्याउने तयारी गरेकाले त्यसमा विमति रहेको केन्द्रीय सदस्य गुरू बरालले बताउनु भएको छ ।
