काठमाडौं । इंग्लिस प्रिमियर लिग-इपिएलमा आज राति चेल्सीले लिगलिडर आर्सनलको सामना गर्दैछ ।
इपीएलअन्तर्गत १३औं चरणको खेलमा आउँदा चेल्सीसँग भर्खरै बार्सिलोनालाई हराएको आत्मविश्वास हुनेछ। यता आर्सनल भने लिग लिडरको हैसियत जोगाउन उच्च प्रदर्शनको लक्ष्यमा हुनेछ। आर्सनल प्रिमियर लिगको शीर्षस्थानमा रहँदै १२ खेलमध्ये ११ खेलमा अपराजित छ।
लिगमा आर्सनलभन्दा ६ अंकले पछि रहेको चेल्सी २३ अंकसाथ तेस्रो स्थानमा छ। उसले पछिल्ला तीन खेल लगातार जितेको छ। टोटेनह्याम, बर्नली र वुल्भ्स सबै चेल्सीसँग गोलविहीन पराजित भएका थिए। त्यसैले, सिजनको सुरुआतमा प्रशिक्षक एन्जो मारेस्कालाई लिएर भएको आलोचना अहिले असम्भवजस्तै लागिरहेको छ। उसले सुरुआतका आठ खेलमा चार जितमात्र निकालेको थियो भने, पछिल्ला ११ मध्ये नौ खेल जित्दै सबै प्रतियोगितामा पुनरागमन गरेको छ। तर यो सिजनमा चेल्सीले घरेलु मैदानमा राम्रो प्रदर्शन गर्न सकेको छैन।
यही हप्ता आर्सनलले पनि बार्यनलाई हराएर आफ्नो टिम फर्ममा रहेको जानकारी दिएको छ। पाँच खेलपछि सय प्रतिशत जित निकाल्ने एक्लो टोली बनेको आर्सनलले जुरियेन टिम्बर, नोनि माडुके र गाब्रिएल मार्टिनेलीको उच्च प्रदर्शनमा नकआउट चरणमा स्थान पक्का गरेको छ।
अन्तर्राष्ट्रिय ब्रेकपछि आर्सनलको प्रतिस्पर्धा कठिन विपक्षीसँग भइरहेको छ। यद्यपि उसले टोटेनह्यामलाई ४-१ ले हराउँदै दोस्रो ठूलो चुनौती सजिलै पार गरिसकेको छ। यदि आज राति पनि आर्सनलको जित रह्यो र अन्य नतिजा अनुकूल आए, सिजनको एक तिहाइ सकिँदा आर्सनलको अग्रता नौ अंकसम्म पुग्न सक्छ।
स्ट्याम्फोर्ड ब्रिज आर्सनलका लागि सहज नभएको मानिन्छ, तर आर्सनलले अन्तिम सात वर्षमा त्यहाँ प्रिमियर लिग खेल हारेको छैन। सन् २०२१ अगस्टमा २-० ले हारेयता आर्सनल चेल्सीविरुद्ध सात खेलमा अपराजित छन्। करिब दुई महिनादेखि बाहिर रहेका चेल्सी स्टार कोल पाल्मर ग्रोइन र टाउकोको चोटबाट फर्किएका छन्।
प्रशिक्षक मारेस्काले उनी खेल्न तयार रहेको बताए पनि लामो समय बाहिर रहेकाले बेन्चबाट सुरुआत गर्ने सम्भावना बढी छ। डारियो एस्सुगो पनि मैदानमा फर्किएका छन्। तर डर्बी खेलमा लेभी कोलविल र रोमियो लाविया भने उपलब्ध हुने छैनन्। मिखाइलो मुद्रिक डोपिङ निलम्बनका कारण अझै टिमबाट टाढै छन्।
आर्सनलतर्फ लेआन्ड्रो ट्रोसार बायर्नविरुद्ध मांसपेशी चोटका कारण बाहिरिएका थिए, तर प्रशिक्षक मिकेल आर्टेटाले गम्भीर नभएको बताएका छन्। गाब्रिएल मार्टिनेली र नोनि माडुके दुवै फिट भइसकेकाले विकल्प प्रशस्त छ। प्रिमियर लिगको प्रत्यक्ष प्रसारण कान्तिपुर म्याक्स एचडीमा हेर्न सक्नु हुनेछ।
