काठमाडौं । पूर्व नेपाली अन्तर्राष्ट्रिय फुटबल विराट जंग शाहीले अखिल नेपाल फुटबल संघ-एन्फाको अध्यक्षमा उम्मेद्वारी प्रस्तुत गर्ने भएका छन्।
उनले आइतबार एक विज्ञप्ति जारी गरेर अध्यक्ष पदमा आफ्नो उम्मेद्वारी दिने जानकारी दिएका हुन्। उनले आफ्नो लामो फुटबल यात्राको अनुभव र आगामी योजनाबारे विचार सार्वजनिकसमेत गरेका छन्। राष्ट्रिय टिमको नेतृत्व सम्हालेका उनले नेपालको फुटबल अवस्था, प्रगति, चुनौती र भविष्यका सम्भावनाबारे गम्भीर रहेको जानकारी दिँदै अध्यक्षका लागि अघि बढ्ने जानकारी दिए।
पूर्व कप्तानले नेपाली फुटबलको वर्तमान स्थितिप्रति चिन्ता व्यक्त गर्दै संरचनागत सुधार बिना ठूलो परिवर्तन सम्भव नहुने स्पष्ट पारे। उनका अनुसार नेपाली फुटबलको समस्या धेरै पुराना छन् त्यसैले संरचना, व्यवस्थापन, प्रशिक्षण, मैदान र दीर्घकालीन योजनाका काम गर्नपर्ने छ।
खेलाडीहरू क्षमतावान भए पनि आधारभूत पूर्वाधारमै कमजोरी रहेको उनको ठम्याई छ। फुटबलले आफूलाई अनुशासन, धैर्य, नेतृत्व र प्रतिबद्धताको पाठ सिकायो भन्दै उनले बाँकी जीवन नेपाली फुटबलको भविष्य निर्माणमा समर्पित गर्ने बताएका हुन्।
