काठमाडौं । दक्षिणपूर्वी एसियाका तीन देशहरू इन्डोनेसिया, मलेसिया र थाइल्यान्डमा आएको बाढी र पहिरोबाट मृत्यु हुनेहरूको संख्या ६ सय नाघेको छ ।
एक सातासम्मको भारी वर्षा र तीव्र हावाहुरीले इन्डोनेसियामा ४ सय ३५, थाइल्यान्डमा १ सय ७० र मलेसियामा तीन जनाको मृत्यु भएको अन्तराष्ट्रिय सञ्चार माध्यमले जनाएका छन्। बाढीपहिरोका कारण तीन देशमा ४० लाख मानिस प्रभावित भएका छन् । जसमध्ये दक्षिणी थाइल्यान्डमा मात्रै ३० लाख मानिस प्रभावित भएको रोयटर्सले जनाएको छ ।
यस्तै बाढीप्रभावित दशौं हजार मानिसलाई सुरक्षित स्थानमा सारिएको छ भने कैयौं हराइरहेका छन् । मलेसियाको विदेश मन्त्रालयले थाइल्यान्डमा फसेका ६ हजार २ सयभन्दा बढी मलेसियालीहरूलाई उद्धार गरेको जानकारी दिएको छ । श्रीलंकामा पनि चक्रवातबाट मानवीयसँगै ठूलो भौतिक क्षति भएको छ ।
त्यहाँ मृत्यु हुनेको संख्या १ सय ५३ पुगेको छ भने १ सय ९१ जना हराइरहेका छन् । राष्ट्रिय राजमार्गदेखि स्थानीय सडकसम्म अवरूद्ध हुँदा राहत तथा सहयोग पुर्याउन कठिनाइ भएको छ। सम्भव भएका क्षेत्रमा हवाई मार्गबाट सहयोग पुर्याइएको जनाइएको छ।
