काठमाडौं । काठमान्डू गोर्खाज चौथो जितसहित नेपाल प्रिमियर लिग-एनपीएलको प्लेअफ नजिक पुगेको छ।
आइतबार भएको गोर्खाजको पाँचौं खेलमा कर्णाली याक्सलाई ५ विकेटले पराजित गरको हो। एक सय ५० रनको लक्ष्य पछ्याएको गोर्खाजले १८ ओभरमा पाँच विकेट गुमाएर एक सय ५५ रन बनाउँदै लक्ष्य पुरा गरेको हो। यो जितले गोर्खाजलाई लिगको दोस्रो स्थानमा पुर्याएको छ।
पहिले ब्याटिङ रोजेको भए पनि कर्णालीले कमजोर सुरूआत गर्यो। उसले २० ओभरमा सात विकेट गुमाएर एक सय ४९ रन बनाएको हो। प्रियांक पञ्चाल शून्य र विलियम बोसिस्टो एक रनमा नै आउट भए। इनिङ्सको पहिलो बलमा करणले पि्रयांकलाई कट एन्ड बोल्ड गरेका थिए भने बोसिस्टो सोहि ओभरको अन्तिम बलमा रनआउट भए।
ओपनर मार्क वाट र पवन सर्राफले ५८ रनको उत्कृष्ट साझेदारी गरेर कर्णालीलाई फर्ममा फर्काएका थिए। २७ बलमा ३० रन बनाएका मार्क रनआउट भए। २९ बलमा पवनले ३५ रनको योगदान गर्न सके। ११ ओभर एक बलमा पवनलाई सान्तोष यादवले एलबिडब्यु धरापमा पारेका हुन्। नाजिबुल्लाह जद्रानले १२ रन बनाए। सोमपाललाई ६ रनमा मिलिन्द कुमारले कट एन्ड बोल्ड गरे।
गुल्सन झाले क्यामियो पारी खेल्दै इनिङ्सलाई गुड नोटमा समाप्त पारे। उनले २२ बलमा ६ चौका र तीन छक्का प्रहार गरेर ४९ रन जोडेका थिए। यससंगै कर्णालीले एक सय ४९ रन बनाउन सकेको हो। पहिलो इनिङमा रासिद खानले दुई विकेट लिए भने करण र मिलिन्द कुमारले एक-एक विकेटसहित किफायति बलिङ गर्न सके।
जवाफमा काठमान्डुका आकाश त्रिपाठी ८ रनमा आउट भए। बेन चार्सवोर्थले ३४ र मिलिन्द कुमारले १५ रनको योगदान गरे। त्यसैगरी, गेरार्ड इरास्मसले ३३ बलमा अविजित ४३ रन जोडेर आफ्नो इनिङ्सलाई सार्थक बनाएका हुन्। जोन सिम्पसनले २१ बलमा ६ बाउन्ड्री प्रहार गर्दै ४१ रन जोडेका थिए। इरास्मस र सोम्पसनले ८६ रनको साझेदारी गरेर गोर्खाजको जितको नजिक पुर्याएका हुन्। जारी लिगमा इरास्मसको यो अन्तिम खेल हो।
यसपछि उनी आईएल टी-१० का लागि युएई जानेछन्। काठमान्डूविरूद्ध नन्दन यादवले तीन विकेट लिएर आफ्नो टिमलाई महत्वपूर्ण योगदान गरे पनि कर्णालीले लिगमा चौथो हार टार्न सकेन्। लिगको शीर्षस्थानमा रहेको सुदूरपश्चिम १० अंकसहित प्ले अफमा पुगिसकेको छ भने दोस्रो र तेस्रो स्थानका गोर्खाज र विराटनगर किंग्स प्लेअफको नजिक छन्।
