काठमाडौं । नेपाली यू-१९ क्रिकेट टिम अहिले एसीसी यू-१९ पुरूष प्रिमियर कपको उपाधि रक्षा अभियनको निर्णायक मोडमा पुगेको छ।
लगातार दोस्रो पटक उपाधिको लक्ष्यसहित यूएई पुगेको टिमले साेमबार उपाधिका लागि घरेलु टिमको सामना गर्नेछ। यूएईको अमजानमा हुने यो खेल साेमबार पौने ११ बजे सुरू हुनेछ। नेपाल प्रतियोगितामा अपराजित रहँदै फाइनल सम्म पुगेको हो। समूह चरणमा नेपालले साउदी अरेबिया र हङकङलाई फराकिलो अन्तरले हराउँदै सेमिफाइनलमा पुगेको हो।
समूह 'सी' को विजेता नेपालले सेमिफाइनलमा मलेसियाको सामना गरेको थियो। नेपालले खेलको बलिङमा निकै सानदार प्रदर्शन गरेर मलेसियालाई ५१ रनमा नै अलआउट गरेको थियो। सेमिफाइनलमा नेपालका नितेश कुमार पटेलले चार विकेट लिएका थिए भने चन्दन रामले तीन विकेट आफ्नो नाममा गरेका थिए।
जवाफमा नेपालले एक विकेट क्षतिमै लक्ष्य पुरा गरेर मलेसियामाथि सानदार जित निकालेको थियो। त्यसअघि नेपाली टिमले हङकङलाई एक सय १९ रनले हराएको थियो। नेपाली टिम लगातार दोस्रो उपाधिको पर्खाइमा छ। यता अर्को फाइनालिस्ट टिम यूएईले ओमान माथि ८ विकेटको जित निकालेर फाइनलमा स्थान बनाएको हो।
