जनकपुर । राप्रपाले पार्टीको नीति विपरित मधेश प्रदेश सरकारमा सहभागी भएकी वन तथा वातावरण मन्त्री कंचन बिच्छालाई प्रदेश सभा सदस्यबाट हटाउने भएको छ ।
पार्टीको नीति र निर्णय विपरित एमाले नेता सरोजकुमार यादवको नेतृत्वमा मधेश सरकार सहभागी हुनुभएकी बिच्छालाई प्रदेश सभा सदस्यबाट निष्काशन गर्ने पत्र आइतबार प्रदेश सभालाई पठाएको हाे । राजनैतिक दलसम्बन्धी ऐन २०७३ को दफा ३४ बमोजिम आवश्यक कारबाहीका लागि निजलाई प्रदेश सभा सदस्यबाट निष्काशन गरेको सुचना जारी गरिदिन राप्रपाका मुख्य सचिव केदार बहादुर अधिकारीको हस्ताक्षरसहित प्रदेश सभालाई पठाइएको पत्रमा उल्लेख छ ।
बिच्छालाई प्रदेश सभा सदस्यबाट निष्काशनको पत्र प्राप्त भएको र सुचना जारी गर्ने सन्दर्भमा प्रदेश सभा सचिवालयभित्र कानुनी परामर्श र छलफल भइरहेको उपसभामुख बबिता कुमारी राउत ईशरले जानकारी दिनुभयो । गत कात्तिक २४ गते उज्यालो हुनु अगाडि महोत्तरीको एक होटलमा मुख्यमन्त्री यादवसँगै मधेश प्रदेश सभामा राप्रपाकी एक मात्र सांसद बिच्छा पनि बिना विभागीय मन्त्री नियुक्त हुनु भएकी थिइन ।
मुख्यमन्त्री यादवको सिफारिसमा महोत्तरीको जलेश्वर नगरपालिका पिगौना स्थायी बसोबास भएकी बिच्छालाई ६ दिन अघि मात्र प्रदेश प्रमुख डा. सुरेन्द्र लाभले वन तथा वातावरण मन्त्रीको जिम्मेवारी तोक्नु भएको थियो । गएको बिहीबार बसेको राप्रपा केन्द्रीय समितिको बैठकले केन्द्रीय अनुशासन समितिको सिफारिसको आधारमा बिच्छालाई ६ महिनाका लागि पार्टीको साधारण सदस्यबाट समेत निलम्बन गर्ने निर्णय गरेको थियो ।
