काठमाडौं । सत्ता गठबन्धनमा रहेका प्रमुख सेचतकहरूले संसदीय गतिविधिलाई प्रभावकारी बनाउनेबारेमा छलफल गरेका छन् ।
सिंहदरबारस्थित नेपाली कांग्रेसको संसदीय दलको कार्यालयमा मंगलबार बसेको सत्तारूढ दलका प्रमुख सचेतकहरूको बैठकले संसदीय काम कारबाहीलाई प्रभावकारी बनाउनेबारेमा छलफल गरेको हो ।
बैठकपछि सञ्चारकर्मीहरूसँग कुरा गर्दै नेकपा एमाले प्रमुख सचेतक महेश बर्तौलाले संसदीय दलको मामिला कसरी प्रभावकारी बनाउने भन्ने बारेमा छलफल गरिएको बताउनु भयो ।
संसद्मा लामो समयदेखि राष्ट्रिय स्वतन्त्र पार्टी र राष्ट्रिय प्रजातन्त्र पार्टीले विरोध गरिरहेको र यो राम्रो नभएकोले यसबारेमा छलफल गरेको उहाँले बताउनु भयो । संघीय निजामति विधेयक, शिक्षा विधेयक जारी अधिवेशनबाट पारित गर्नेगरी अघि बढाउने बारेमा छलफल गरेको उहाँले बताउनु भयो ।
उहाँले सत्तारूढ दलहरूबीच भूमिसम्बन्धी विधेयकका बारेमा पनि छिटो भन्दा छिटो असझदारीलाई समझदारीमा रूपान्तरण गर्नेगरी अघि बढ्ने सहमति भएको पनि बताउनु भयो ।
