भक्तपुर । नेकपा माओवादी केन्द्रका अध्यक्ष पुष्पकमल दाहालले आत्मनिर्भर राष्ट्रिय अर्थतन्त्रको विकास गर्ने प्रक्रियाबाट मात्र देशलाई समृद्ध बनाउन सकिने बताउनुभएको छ ।
भक्तपुरमा आयोजित चाँगुनारायण सिटी एभोकाडो सिटी अभियानको समापन कार्यक्रममा बोल्दै अध्यक्ष दाहालले मौलिक नमुनासहितको आत्मनिर्भर राष्ट्रिय अर्थतन्त्र अपरिहार्य रहेको बताउनुभएको हो ।
देशमा भएको स्रोत साधन र सिपलाई अधिकतम प्रयोग गरी स्थानिय तहमार्फत मौलिक विकासको नमुनाबाट युवाहरूलाई स्वदेशमै रोजगारी दिएर देशको अर्थतन्त्रको विकास गर्न सकिने धारण उहाँले राख्नुभयो ।
नेपाल कृषि, पर्यटन विकास, उर्जा तथा अन्य क्षेत्रहरूमा भएको सम्भावनालाई खोजी गरी पालिकाको वस्तुस्थिति तथा इतिहास संस्कृति तथा विकासको गहिराइ बुझेर रोजगारीको अवसर सृजना गर्नुपर्ने समेत उहाँले धारण राख्नुभयो । देशमा मौलिक अर्थतन्त्रको मोडल विकास नगर्दा युवाहरूमा विदेश जाने र नक्कल गर्ने प्रवित्ति बढेको भन्दै चिन्ता व्यक्त गर्नुभयो ।
सकारात्मक सोचका साथ रचनात्मक काम अघि बढाउन सकिएमा देशमै रोजगार सृजना भई उत्पादकत्व वृद्धि हुने र विदेश जाने संस्कृतिलाई निरूत्साहित गर्न सकिने उहाँले बताउनुभयो ।
नागरिकको केही हिस्सा आफ्नै देशमा केही गर्ने सोचका साथ विभिन्न गतिविधिमा सकृय भएको देखेको बताउँदै अध्यक्ष दाहालले नयाँ नेपाल निर्माणका लागि सबैले त्यसलाई प्रोत्साहित गर्नुपर्नेमा जोड दिनुभयो ।
युवाहरूमा आफनो देशको संस्कृति इतिहास, जाति, भाषा र प्रकृति तथा देश विकासको प्रकृया प्रति गर्व गर्ने मानसिकताको विकास गर्ने ठुलो चुनौतिको रूपमा रहेको समेत उहाँले बताउनुभयो ।
