काठमाडौं । चौतर्फी दबाबपछि बागमती प्रदेशका मुख्यमन्त्री बहादुरसिंह लामाले राजीनामा दिने तयारी गर्नुभएको छ ।
नेपाली कांग्रेस संसदीय दलको नेतामा पराजित भएपछि उहाँले नैतिकताका आधारमा मुख्यमन्त्रीबाट पनि राजीनामा दिन लाग्नुभएको हो । पार्टी सभापति शेरबहादुर देउवासँग हिजो साँझ भेटेपछि मुख्यमन्त्री लामाले राजीनामा दिन लाग्नुभएको हो ।
भेटमा सभापति देउवाले संसदीय दलमा पराजित भएपछि नयाँ सरकार गठनको मार्गप्रसस्त गर्न निर्देशन दिनुभएको थियो । मुख्यमन्त्री लामाले कान्तिपुर समाचारसँग कुरा गर्दै सभापति देउवासमक्ष आफ्ना कुरा राखेको थप परामर्शमै रहेको बताउनुभयो । भोलिसम्म काठमाडौंमा रहने र पर्सी हेटौंडा गएर निर्णयमा पुग्ने उहाँले जानकारी दिनुभयो ।
गत मंगलबार भएको नेपाली कांग्रेस बागमती प्रदेश संसदीय दलको निर्वाचनमा इन्द्र बानियाँसँग मुख्यमन्त्री लामा पराजित हुनुभएको थियो । त्यसपछि उहाँलाई मुख्यमन्त्री छाड्ने दबाब परेको थियो । तर लामाले संसदीय दलमा पराजित भए पनि मुख्यमन्त्री नछाड्ने अडान राख्दै आउनुभएको थियो ।
