काठमाडौं । पार्टीको आन्तरिक विवादसँगै सरकारमा हुँदा विवादित बनेको नागरिक उन्मुक्ती पार्टीलाई फेरि सरकारमा सहभागी गराउने तयारी भएको छ। केन्द्र र प्रदेश दुवै सरकारमा नउपालाई सहभागी गराउने गरी छलफल अघि बढाइएको हो ।
विवादमा मुछिएका उक्त पार्टीका मन्त्री रामेश्वर चौधरीलाई हटाएपछि केन्द्र र प्रदेश दुवैमा समर्थन फिर्ता लिएको थियो । लगातार दुईजना मन्त्री एकपछि अर्को गर्दै हटाइएको उद्योग, पर्यटन, वन तथा वातावरण मन्त्रालय फेरि नाउपालाई नै दिने तयारी सुदूरपश्चिमका मुख्यमन्त्री कमलबहादुर शाहले गर्नुभएको छ ।
बिहीबार प्रदेश सभामा विश्वासको मत लिँदा आफ्नो पक्षमा मतदान गरेका नाउपाका कैलाश चौधरीलाई मन्त्री बनाउने तयारी शाहको छ। सुदूरपश्चिममा यसअघि आर्थिक विवादमा मुछिएपछि नाउपाका दुई जना मन्त्रीलाई हटाइएको थियो ।
संघीय सरकारबाट पनि नाउपाले समर्थन फिर्ता लिएको छ। तर पर्यटन राज्यमन्त्रीबाट राजीनामा दिएका अरूण चौधरीको राजीनामा अहिले पनि प्रधानमन्त्री केपी शर्मा ओलीले स्वीकृत गर्नुभएको छैन ।
अहिले नाउपा भित्रको विवाद उत्कर्षमा छ । पार्टीका संरक्षक रेशम चौधरीले रञ्जिता श्रेष्ठलाइ हटाएर लालवीर चौधरीलाई अध्यक्ष बनाउनुभएको छ ।
