काठमाडौं । नेकपा एमालेको संस्थापन पक्षले पूर्वराष्ट्रपति विद्यादेवी भण्डारीलाई पार्टी सक्रिय हुन रोक्ने रणनीति बनाउन थालेको छ ।
संस्थापन पक्षका नेताहरूले आगामी भदौमा हुने विधान महाधिवेशनमा पूर्वराष्ट्रपति भण्डारीलाई प्रतिनिधि भएर सहभागी हुने बाटो नरहेको बताएका छन् ।
कान्तिपुर समाचारसँग कुरा गर्दै एमाले स्थायी समिति सदस्यसमेत रहेका प्रचार विभाग प्रमुख राजेन्द्र गौतमले पार्टीको विधानले चितवनमा सम्पन्न १०औँ राष्ट्रिय महाधिवेशनमा सहभागी प्रतिनिधिलाई मात्रै स्वीकारेको बताउनुभयो ।
भण्डारीले केन्द्रीय सदस्यका रूपमा आफूलाई विधान महाधिवेशनमा सहभागी गराउने अपेक्षा राखिरहेका बेला एमाले प्रचार विभाग प्रमुखले अहिलेको विधानअनुसार उहाँ प्रतिनिधि हुन नसक्ने स्पष्ट पार्नुभयो । विधान महाधिवेशनमा प्रतिनिधि बनाउन पार्टीले विशेष ब्यवस्था गर्नुपर्ने उहाँको भनाइ छ ।
नेता गौतमले भदौ २० देखि २२ गतेसम्म हुने विधान महाधिवेशनमा पेस हुने विधान संशोधन प्रतिवेदन आगामी सचिवालय, पोलिटब्यूरो र केन्द्रीय कमिटीमा पेस गर्ने तयारी भइरहेको बताउनुभयो ।
पार्टीले ७० वर्षे उमेर हद स्थगन गरिसकेको र दुई कार्यकालको ब्यवस्था पनि यसअघि नै हटाइएकाले त्यहीअनुसारको विधान महाधिवेशनमा विधान संशोधन प्रस्तुत् गर्ने तयारी संस्थापन पक्षको छ ।
नेता गौतमले मिसन ८४ को कमाण्डर नै अध्यक्ष ओलीलाई तोकिएकाले ११औँ महाधिवेशनबाट पनि ओलीले नै नेतृत्व लिने दाबी गर्नुभयो । पूर्वराष्ट्रपति भण्डारीले एमालेको ११औं महाधिवेशनबाट नेतृत्वमा आउने चाहना व्यक्त गरिरहनुभएको छ । तर उहाँलाई रोक्न एमालेको संस्थापन पक्ष अहिलेदेखि नै कसरतमा लागेको हो ।
