सप्तरी । राजविराज राजदेवी रोयल र तिरहुट टाइगर्स सप्तरीको राजविराजमा जारी सातौं संस्करणको मेयर कप सप्तरी प्राइड लिगको फाइनलमा प्रवेश गरेका छन् ।
निरन्तर वर्षाका कारण आजका दुवै सेमिफाइनल खेल रद्द हुँदा समूह चरणमा दुई समूहका विजेता टिम फाइनल प्रवेश गरेका हुन् ।
रोयल र डिफेन्डिङ च्याम्पियनसमेत रहेको टाइगर्स उपाधिका लागि भोलि प्रतिस्पर्धा गर्नेछन् ।
राजविराज राजदेवी रोयल र खडक वारियर्सबीचको आजको पहिलो सेमिफाइनल तथा तिरहुट टाइगर्स र कन्चनरुप राइनोजबीचको दोस्रो सेमिफाइनल खेल निरन्तर वर्षाका कारण सम्भव हुन सकेन ।
प्रतियोगितामा सहभागी ८ टिमलाई दुई समुहमा विभाजन गरिएको थियो ।
समूह ए को विजेताको रुपमा राजविराज राजदेवी रोयल सेमिफाइनल प्रवेश गरेको थियो। यस्तै समूह बी बाट समूह विजेताका रुपमा तिरहुट टाइगर्स सेमिफाइनल प्रवेश गरेको थियो । सप्तरी क्रिकेट संघले गरेको प्रतियोगिताको विजेताले २ लाख तथा उपविजेताले एक लाख रुपैयाँ प्राप्त गर्नेछन् ।
