काठमाडौं । परराष्ट्रमन्त्री डा. आरजु राणा देउवाले राजनीति गर्नेहरूकै कारण देश खत्तम भयो भन्ने भाष्यको विकास हुँदै गएको बताउनुभएको छ । बिहीबार ‘सात प्रदेशको चित्र एउटै क्यानभासभित्र’ पुस्तक लोकार्पण समारोहलाई सम्बोधन गर्दै उहाँले राजनीति गर्नेहरूकै कारण मुलुकमा सधैं असहज परिस्थिति बन्ने गरेको तर्क गर्नुभयो ।
उहाँले आफू परराष्ट्रमन्त्री भइसकेपछि विदेश भ्रमणका क्रममा कसैबाट पनि नेपालप्रति नकारात्मक प्रतिक्रिया नपाएको सुनाउनु भयो । नेपाललाई हेर्ने विश्व समाजको नजर एकदमै सकारात्मक रहेको उहाँको भनाइ छ । उहाँले सही किसिमको राजनीति नभएकै कारण युवाहरू विदेश पलायन हुने र देशभित्र आन्दोलन भइरहने स्थिति आएको समेत बताउनुभयो ।
उहाँले भन्नुभयो, “किन हाम्रो देशमा सधैं संघर्ष हुन्छ । कहिले सडक आन्दोलन, कहिले धर्ना । किन हामी यसमा समय खर्च गरिरहेका छौं ? यो एउटा गम्भीर प्रश्न बन्दै गएको छ । कहिलेकाहीँ लाग्छ कि हामी राजनीति गर्ने मान्छेहरू नै यसको दोषी हो कि ! जहिले पनि एउटा किसिमको असहज परिस्थिति बनाइराख्ने, यो पुगेको छैन, त्यो पुगेको छैन, देश खत्तम भयो भन्ने सोचको विकास गरेर लग्ने यो हामी राजनीति गर्नेहरूकै दोष हो कि जस्तो पनि लाग्छ ।”
उहाँले अन्य मुलुकमा नेपालको छवि सकारात्मक भएको पनि बताउनुभयो । “अहिले म परराष्ट्रमन्त्री भएपछि धेरै देशहरू गएँ । धेरै देशको मान्छेहरूसँग मैले आफ्नो कुराहरू आदान प्रदान गर्ने मौका पाएँ । तर अहिलेसम्म एउटा मान्छे पनि भेटिनँ जसले तिम्रो देश खत्तम भयो, विकास भएको छैन, तिमीहरूको देशमा आउँदिनँ भन्ने एउटा पनि मान्छे भेटिनँ । हामी नेपालीलाई हेर्ने दुनियाँको नजर एकदमै सकारात्मक छ । हामी देशभित्र बस्नेले चाहिँ किन नकारात्मक बनाइरहेका छौं ?”
सबैले आफ्नो मुलुकलाई चिनेर समृद्धिको यात्रामा अघि बढ्न जरुरी रहेको उहाँको भनाइ छ ।
