बाँके । माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहालले सबै राजनीतिक दल एउटै र उस्तै हुन् भन्ने भाष्य निर्माण गर्न खोजिनु गलत भएको बताउनुभएको छ ।
तराई मधेश केन्द्रित जागरण अभियानका क्रममा बाँकेको नेपालगञ्जमा नागरिकहरूसँग अन्तर्क्रिया गर्दै माओवादी अध्यक्ष दाहालले सबै राजनीतिक दल उस्तै नभएको दाबी गर्नुभयो । उहाँले भन्नुभयो, 'सबै उस्तै हुन् भन्ने भाष्य निर्माण गर्दा प्रतिगमनकारीलाई बल पुग्छ । सबै उस्तै होइनन् ।'
कार्यक्रममा सहभागीहरुले मुख्य राजनीतिक दलको नेतृत्व अपारदर्शी हुँदा, सेवा प्रवाहमा ध्यान नदिँदा र सुशासन कायम गर्न नसकेकै कारण सबै दलको नेतृत्व उस्तै लाग्ने गरेको बताएका थिए । अध्यक्ष दाहालले आफूले प्रधानमन्त्री हुँदा भ्रष्टाचारी, विचौलिया र दलालहरुका विरुद्ध अभियान नै चलाएको दाबी गर्नु भयो । उहाँले आफूहरूबाट पनि विगतमा काम गर्दा गल्ती भएको स्वीकार गर्दै अब सच्याएर जाने प्रतिबद्धतासमेत जनाउनु भयो । उहाँले आफूहरु अरुभन्दा भिन्न र परिवर्तनको पक्षमा रहेको दाबी गर्नु भयो । उहाँले परिवर्तनको माया अरुलाई भन्दा आफूहरुलाई बढी भएको र यसलाई जोगाउन फेरि पनि लागिपर्ने बेला आएको बताउनु भयो ।
दाहालले जागरण अभियानका क्रममा नागरिकहरूसँग सोझै संवाद भएको र यसले नागरिकमा रहेका गुनासा र असन्तुष्टि बुझ्न सहज बनाएको बताउनु भयो । उहाँले नागरिकका गुनासा र सुझावका आधारमा आफू सच्चिएर काम गर्ने प्रतिबद्धता जनाउनु भयो । तराई-मधेश जागरण अभियानअन्तर्गत आज बाँके आइपुग्नु भएका अध्यक्ष दाहाल भोलि बर्दिया पुग्नुहुनेछ ।
