काठमाडौं । सभामुख देवराज घिमिरेले संसद् बैठकमा विपक्षी दलहरूले गरिरहेको अवरोध हटाउन गरेको प्रयास असफल भएको छ ।
सभामुख घिमिरेले शुक्रबार दलका प्रमुख सचेतकहरूसँग छलफल गरेर संसद्को अवरोध हटाउन आग्रह गर्नुभएको हो । तर, प्रतिनिधिसभाका विपक्षी दलहरूले भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय छानबिन समिति गठन नभएसम्म संसद् चल्न नदिने अडान दोहोर्याएपछि सभामुखको प्रयास सफल हुन नसकेको हो ।
प्रतिनिधिसभाको बैठक यही जेठ २० गतेका लागि बोलाइएको छ । सोही सन्दर्भमा संसदमा रहेको अवरोधन खुलाउन सभामुख देवराज घिमिरेले बोलाएको प्रमुख सचेतकहरूको बैठकमा विपक्षी दलका प्रमुख सचेतकहरूले आफूहरूले उठाएका विषय सम्बोधन नभएसम्म सदन चल्न नदिने बताएका हुन् ।
बैठकपछि प्रमुख प्रतिपक्षी दल नेकपा माओवादी केन्द्रका प्रमुख सचेतक हितराज पाण्डे र विपक्षी दल राष्ट्रिय स्वतन्त्र पार्टीका प्रमुख सचेतक सन्तोष परियारले आफूहरुका माग सम्बोधन नभएसम्म बैठक चल्न नदिने बताउनुभयो ।
नेपाली कांग्रेसका प्रमुख सचेतक श्याम घिमिरेले भने सदनको अवरोधका विषयमा औपचारिक कुरा नभएको बताउनुभयो । संसद्को क्यालेन्डर बनाउने विषयमा मात्र आजको बैठक केन्द्रित रहेको उहाँको भनाइ थियो । उहाँ विपक्षीहरूले पेशगर्दा जस्तै छलफलका क्रममा पनि सहयोग गर्ने विश्वास व्यक्त गर्नुभयो ।
सभामुख घिमिरेले बजेटमाथिको सैद्धान्तिक छलफलमा क्यालेन्डर बनाउने विषयमा प्रमुख सचेतकहरुको बैठक बोलाउनुभएको हो । त्यसपछि बसेको कार्यव्यवस्था परामर्श समितिको बैठकले असार १५ गतेसम्मको क्यालेन्डर बनाएको छ ।
