काठमाडौं । गृहमन्त्री रमेश लेखकले राजतन्त्र पक्षधरहरुले काठमाडौंको तीनकुने क्षेत्रमा हिजो गरेको आगजनी र हिंसात्मक घटनामा भएको क्षतिको आज स्थलगत निरीक्षण गर्नुभएको छ ।
मन्त्री लेखकले काठमाडौंको तीनकुनेमा राजतन्त्र पक्षधरहरूले आगजनी गरेर ध्वस्त बनाएको घर निरीक्षण गर्नुभएको हो ।
यही घरमा एभिन्यूज टेलिभिजनका क्यामेरा पर्सन सुरेश रजकको जलेर मृत्यु भएको थियो । यसैगरी गृहमन्त्री लेखकले राजतन्त्र पक्षधरले आक्रमण गरेर क्षति पुर्याएका तीनकुनेस्थित कान्तिपुर टेलिभिजनको कार्यालय, अन्नपूर्ण पोस्टको कार्यालय, भाटभटेनी सुपरमार्केट, नागरिक उड्डयन प्राधिकरणको कार्यालयमा पुगेर पनि अनुगमन गर्नुभयो ।
मन्त्री लेखकले राजतन्त्र पक्षधरले हिजो गरेको प्रदर्शनका पछाडि कुनै दल र राजनीतिक चेतना भएका मानिसको संलग्नता नरहेको भन्दै आपराधिक घटनामा संलग्नहरुलाई कानुनको दायरामा ल्याएर कारबाही गर्ने प्रतिबद्धता व्यक्त गर्नुभयो ।
गृहमन्त्री लेखकले हिजोको प्रदर्शनका क्रममा घाइते भएकाहरूको उपचारको व्यवस्था सरकारले गर्ने जानकारी पनि दिनुभयो ।
