दाङ । नेपाली कांग्रेस लुम्बिनी प्रदेशको प्रमुख सचेतकमा नमूना ढकाल नियुक्त हुनु भएको छ ।
नेपाली कांग्रेसको समानुपातिकतर्फबाट निर्वाचित रुपन्देहीकी प्रदेशसभा सदस्य ढकाललाई संसदीय दलका नेता डिल्लीबहादुर चौधरीले आज प्रमुख सचेतकमा नियुक्त गर्नु भएको हो ।
मन्त्री बन्ने सूचिमा रहेर पनि अन्तिम समयमा मन्त्री बन्न नपाएका यसअघिका प्रमुख सचेतक जन्मजय तिमिल्सिनाले गत साउनमा राजीनामा दिएपछि नेपाली कांग्रेस लुम्बिनी प्रदेशमा प्रमुख सचेतक पद रिक्त थियो ।
प्रमुख सचेतकमा ढकाललाई नियुक्त गरिए पनि निमा गिरिले राजीनामा दिएको सचेतक पद भने रिक्त नै छ ।
यसैबीच, नेपाली कांग्रेसबाट आज दुई मन्त्री थपिने भनिए पनि त्यसको टुंगो लाग्न सकेन । गत साउन ९ गते मुख्यमन्त्री बन्नु भएका चेतनारायण आचार्यले अझै मन्त्रिपरिषद्लाई पूर्णता दिन सक्नु भएको छैन । लुम्बिनी प्रदेशमा चार मन्त्रालय रिक्त छन् ।
