काठमाडौं । सत्तारुढ नेकपा एमालेले पदाधिकारी तथा केन्द्रीय नेताहरूको जिम्मेवारी हेरफेर गर्ने भएको छ ।
काठमाडौंको हनुमानस्थानस्थित होटेल बसेरामा जारी एमाले सचिवालय बैठकले एक वर्षअघि तोकेको पदाधिकारीदेखि केन्द्रीय सदस्यहरूको कार्य विभाजन फेरबदल गर्न लागेको हो । बैठकले सात प्रदेशका पार्टी इन्चार्ज, अध्यक्ष तथा ७७ जिल्लाका इन्चार्ज तोक्नेछ ।
त्यसैगरी पार्टीका विभागहरू, निर्वाचन क्षेत्रका इन्चार्ज र पालिकाहरूको समेत इन्चार्ज तोक्ने पार्टी प्रचार विभाग प्रमुख राजेन्द्र गौतमले जानकारी दिनुभयो । गत वर्षको जेठमा एमालेले सात प्रदेश तथा ७७ जिल्लामा फरक भूगोलका नेताहरूलाई जिम्मेवारी दिएर खटाएको थियो ।
त्यसैगरी बैठकले पार्टीका विभागहरूको समेत जिम्मेवारी तोक्नेछ । सचिवालय बैठकले पार्टीले सरकारको नेतृत्व लिएपछिको राजनीतिक घटनाक्रमको समीक्षालगायत सरकारको कामकारबाहीको समेत समीक्षा गर्ने प्रचार विभाग प्रमुख गौतमले बताउनुभयो ।
ललितपुरस्थित पार्टी कार्यालय च्यासलमा बाढी पसेर बैठक बस्नै असजिलो भएपछि होटेलमा बैठक राख्नुपरेको एमालेले जनाएको छ ।
