काठमाडौं । सातवटै प्रदेश सरकारहरूले सोमबार आगामी आर्थीक वर्ष २०८३/०८४ का लागि बजेट ल्याउँदै छन्।
प्रदेश सरकारहरुले सीमित स्रोतसाधन, बढ्दो दायित्व तथा विकास निर्माणका अपूरा कामलाई मध्यनजर बजेट ल्याउने दाबी गरेका छन् । प्रदेश गौरवका आयोजना, बहुवर्षीय तथा क्रमागत योजनालाई उच्च प्राथमिकतामा राखेर बजेट तयारी गरेका छन्।
जसअनुसार लुम्बिनी प्रदेशमा सोमबार बेलुका ५ बजे आर्थिक मामिला तथा योजनामन्त्री धनेन्द्र कार्कीले आगामी आर्थिक वर्ष २०८३/०८४को बजेट पेस गर्नुहुनेछ। बजेटमा उत्पादन वृद्धि, रोजगारी सिर्जना, पूर्वाधार विकास, सुशासन तथा सामाजिक न्याय केन्द्रित, तथा हुनेगरी कृषि क्षेत्रको आधुनिकीकरण, आयात प्रतिस्थापन र निर्यात प्रवर्द्धन, युवालक्षित कार्यक्रमसँगै शिक्षा स्वास्थ्य खेलकुद र पूर्वाधार विकास, पुँजीगत खर्चको प्रभावकारिता बढाउने तथा प्रदेश गौरवका आयोजनालाई निरन्तरता दिने र अधुरा तथा बहुवर्षीय आयोजना सम्पन्न गर्नेगरी ३८ अर्बको हाराहारीमा बजेट ल्याउने तयारी गरेको छ।
त्यस्तै मधेश प्रदेश सरकारले अगामी बजेट कृषि क्षेत्रलाई विशेष प्राथमिकतामा राखेर ल्याउने सोमबार दिउँसो १ बजे बजेट ल्याउने भएको छ। मुख्यमन्त्री कृष्ण प्रसाद यादवले कृषिमा आधारित रहको मधेशलाई आत्म निर्भर बनाउने उदेश्यले १७ हजार किसान लाभान्वित हुने गरी दुई बाली धान उत्पादन, केरा खेती,आप खेती र गोलभेडा खेतीलाई प्रवर्द्धन गर्न वजेट बिनियोजन गरिएको बताउनुभएको छ।
निति तथा कार्यक्रम अनुसार कृषिसँगै स्वास्थ्य, शिक्षा र सामाजिक क्षेत्र पनि बजेटको प्राथमिकतामा छन्। यसैबीच कोशी प्रदेश सरकारले पनि स्थानिय तह र ग्रामिण तथा हिमाली क्षेत्रलाई प्राथमिकतामा राखेर बजेट ल्याउने तयारी गरेको छ। पहाड क्षेत्रमा बढ्दो बसाइसराइ रोक्ने योजना यसपटक कोशी प्रदेश सरकारको लक्ष्य रहेको छ।
