काठमाडौं । बागमती प्रदेशको मुख्यमन्त्रीमा नेपाली कांग्रेस संसदीय दलका नेता बहादुरसिंह लामा नियुक्त हुनुभएको छ । उहाँलाई प्रदेश प्रमुख यादवचन्द्र शर्माले बागमती प्रदेशको मुख्यमन्त्रीमा मंगलबार नियुक्त गर्नुभएको हो ।
प्रदेश प्रमुख शर्माले संविधानको धारा १६८ (२) बमोजिम लामालाई मुख्यमन्त्रीमा नियुक्ति गर्नुभएको हो । लामाले आजै दिउँसो कांग्रेस र एमालेको समर्थनमा मुख्यमन्त्रीमा दाबी पेस गर्नुभएको थियो ।
लामालाई मुख्यमन्त्री बनाउन नेपाली कांग्रेसका ३७ र एमालेका २७ सांसदले हस्ताक्षर गरी दाबी पेस गरिएको थियो । मुख्यमन्त्रीको शपथग्रहण भने भोलि (बुधबार) बिहान ११ बजेका लागि तय भएको छ ।
यस्तै लुम्बिनी प्रदेशका नवनियुक्त मुख्यमन्त्री चेतनारायण आचार्यले भोलि (बुधबार) मात्रै शपथ गर्नुहुने भएको छ । एमालेबाट मुख्यमन्त्री बन्नुभएका आचार्यले कांग्रेससँग मन्त्रालय भागबन्डा मिलाएपछि मात्रै शपथ गर्न लाग्नुभएको हो । लुम्बिनीमा अहिलेसम्म मन्त्रालयको भागबन्डा मिलिसकेको छैन । मन्त्रालय बाँडफाँटपछि मन्त्रीसमेत टुंगो लगाएर शपथ गर्ने उहाँको तयारी छ ।
यता कोशी प्रदेशमा भने माओवादी केन्द्रबाट मन्त्री बनेकाहरूले सरकारबाट बाहिरिने कुनै छाँट देखाएका छैनन् । राजनीतिक समीकरण परिवर्तन भइसक्दा पनि माओवादी केन्द्र कोशी प्रदेश सरकारबाट नबाहिरिएको हो । मुख्यमन्त्री हिक्मतकुमार कार्कीले अब केही दिनभित्रै केन्द्रीय सत्ता गठबन्धनअनुसार सरकार पुनर्गठन गरिने जानकारी दिनुभयो ।
उता मुख्यमन्त्री दीर्घराज सोडारी नै अनुपस्थित भएपछि सुदूरपश्चिम प्रदेशसभाको विशेष अधिवेशन नै चल्न सकेन । नेपाली कांग्रेस र नेकपा एमालेका प्रदेशसभा सदस्यहरुको आग्रहमा विशेष अधिवेशन बोलाइएको भए पनि मुख्यमन्त्री सोडारी अनुपस्थित भएपछि बैठक चल्न नसकेको हो । कांग्रेस र एमालेले प्रदेशसभाको विशेष अधिवेशनमा मुख्यमन्त्री अनुपस्थित हुनु गैरजिम्मेवार र प्रदेश प्रमुखको अपमान भएको बताएको छ ।