काठमाडौं । राष्ट्रिय स्वतन्त्र पार्टीका सांसद मनिष झाले बंगलादेशमा सरकारी आरक्षण कोटाको विरोधमा भएको आन्दोलनमा नेपाली विद्यार्थीको अवस्थाबारे तत्काल संसद्लाई जानकारी गराउन सरकारसँग माग गर्नुभएको छ ।
मंगलबार प्रतिनिधिसभा बैठकमा आकस्मिक समय लिएर बोल्दै उहाँले त्यहाँ हिंसात्मक आन्दोलन भएको र नेपालीहरु सुरक्षित अवस्थामा रहे पनि त्यसबारे सरकारले संसदलाई विस्तृत जानकारी गराउनुपर्ने बताउनु भयो ।
‘केही दिन अगाडि बंगलादेशमा आरक्षणसम्बन्धि विषयको विवाद अन्तरगत केही बिरोधहरु भयो । त्यसले आक्रमक रुपमा आन्दोलनको रुप पनि लियो । लगभग १५० जनाभन्दा धेरैको मृत्यु भयो । नेपालबाट त्यहाँ अध्ययनका लागि गएका धेरै नेपाली विद्यार्थीहरु आपतकालीन अवस्थामा त्यहाँबाट फर्किए,' उहाँले भन्नुभयो, 'त्यो सबै परिस्थितिका बारेमा आधिकारिक रुपमा परराष्ट्र मन्त्रालयले सदनमा आएर जानकारी गराउनुपर्ने हो । त्यो जानकारी अहिलेसम्म भएको छैन । तसर्थ त्यो जानकारी उपलब्ध गराइदिनका लागि सम्बन्धित मन्त्रालयलाई सभामुखमार्फत अनुरोध गर्न चाहन्छु ।’
