काठमाडौं । नेपाली कांग्रेसले प्रधानमन्त्री पुष्पकमल दाहालले असार २८ गते संसद्मा राख्ने विश्वासको मतको प्रस्तावको विपक्षमा मतदान गर्ने निर्णय गरेको छ ।
संसद् भवन बानेश्वरमा आज (शनिबार) बसेको कांग्रेस संसदीय दलको बैठकले प्रधानमन्त्रीले राख्ने प्रस्तावको विपक्षमा मतदान गर्ने निर्णय गरेको हो । बैठकले नेकपा एमालेसँग भएको सहमतिअनुसार संविधानको धारा ७६ को उपधारा २ अनुसारै नयाँ सरकार गठन गर्ने निर्णयसमेत गरेको प्रमुख सचेतक रमेश लेखकले जनाउनुभयो ।
कांग्रेसले अविरल वर्षाका कारण देशका विभिन्न स्थानमा बाढी, पहिरो र डुबान भएका कारण जनजीवन कष्टकर भएको भन्दै नागरिकको जीवन सहज बनाउन सरकारलाई आग्रह गरेको छ । बैठकले बाढीपहिरो पीडितको सहायतामा जुट्नसमेत पार्टीका सबै संरचनालाई निर्देशनसमेत दिएको छ ।
