काठमाडौं । जनमत पार्टीका सांसद अब्दुल खानले मिर्चैया नर्सिङ क्यापसले अवैधरुमा शुल्क उठाएको विषयमा सरकारले ध्यानाकर्षण गराउनुभएको छ । उहाँले कान्तिपुर टेलिभिजनले बुधबार प्रसारण प्रसारण गरेको उल्लेख गर्दै सरकारले गर्ने काम मिडियाले गरेको भन्दै त्यो विषयमा सरकारको धारणा माग गर्नुभएको छ ।
'अहिले देशभरी शिक्षा क्षेत्रमा मनपरी चलिरहेको छ,' उहाँले भन्नुभयो, 'कान्तिपुरले सिरहाको मिर्चैयामा सञ्चालित मिर्चैया हेल्थ नर्सिङ क्याम्पसले विद्यार्थीहरुसँग अवैध रुपमा लाखौं रकम असुली गरिरहेको विषय पर्दाफास गरेको छ । सीटीभीटीले तोके बमोजिम तीन वर्षे नर्सिङका लागि ४ लाख ७५ हजार शुल्क मात्रै लिन पाइन्छ । त्यो पनि पहिलो किस्तामा १ लाख ९० हजार मात्रै लिन पाइन्छ । तर यो कलेजले एकै वर्षमा विद्यार्थीहरुसँग झन्डै ४ लाखसम्म असुलेको बैंक भौचरहरु नै सार्वजनिक भएका छन् ।'
कलेजले कानुन विपरीत छात्रावास पनि अनिवार्य गरेको उहाँले उल्लेख गर्दै सरकारको ध्यानाकर्षण गराउनुभएको छ । 'सरकार र सरकारी संयन्त्र इमानदार भइदिएको भए एउटा कलेजले यत्रो मनपरी साहस कसरी गर्न सक्छ ?,' उहाँले प्रश्न गर्नुभयो, 'सरकारले गर्ने काम मिडियाले गरेको छ । अब सरकारले भनिदिनुपर्यो । अझै यसमा छानबिन र कारबाही गर्ने कि नगर्ने ?'
कान्तिपुर टेलिभिजनले बुधबार सिरहाको मिर्चैयास्थित मिर्चैया हेल्थ नर्सिङ क्याम्पसले विद्यार्थीसँग अवैध रुपमा लाखौं रकम असुली गरेको खुलासा गरेको थियो । क्याम्पसले नर्सिङ विषयमा अध्ययनरत विद्यार्थीसँग कक्षा शुल्कदेखि छात्रावास र प्रयोगात्मक अभ्यासलगायतका नाममा मनपरी शुल्क लिएको रिपोर्टमा सार्वजनिक भएको थियो ।
हेर्नुहोस् कान्तिपुर टेलिभिजनमा बुधबार प्रकाशित रिपोर्ट :
मिर्चैया हेल्थ नर्सिङ क्याम्पसद्वारा विद्यार्थीसँग अवैध रुपमा लाखौं रकम असुली