काठमाडौं । सांसद अमरेशकुमार सिंहले कबाडी व्यवसायीलाई फोहोर बालेनको घर अगाडि लगेर थुपार्न आग्रह गर्नुभएको छ । प्रतिनिधिसभा बैठकमा बोल्दै उहाँले काठमाडौं महानगरपालिकाले कबाडी व्यवसाय सञ्चालन गर्न निदएको र आन्दोलनमा कुटपिट गरेको भन्दै व्यवसायीलाई यस्तो आग्रह गर्नुभएको हो ।
'बालेनजीले सिकाउनुभएको छ । यदि काम भएन भने त्यहीँ लगेर फोहोर थुपार्ने हो,' उहाँले भन्नुभयो, 'उहाँले नै सडकविभाग अगाडि लगेर फोहोर थुपार्नुभएको छ । सबै कबाडी व्यवासायीलाई अनुरोध गर्छु सबै फोहोर बालेन शाहको घर अगाडि लगेर थुपारौं । त्यसको लागि हामी साथमा छौं ।'
पाटन उच्च अदालतले कबाडीलाई नहटाउनु भनेर दिएको आदेश पनि काठमाडौं महानगरपालिकाका मेयर बालेन शाहले नमानेको भन्दै उहाँले आक्रोश व्यक्त गर्नुभयो । 'मधेसका कबाडी व्यवसायी आन्दोलनरत छन् । पाटन उच्च अदालतले पनि उनीहरुको कबाडीलाई नहटाउनु भनेर । उनीहरुले शान्तिपूर्ण आन्दोलन गर्दा लाठी चार्ज भयो,' उहाँले भन्नुभयो ।
उहाँले देशमा अहिले पनि रंगभेद रहेको दाबी गर्नुभयो । एउटा समूहले आन्दोलन गर्दा पानीको फोहोर हान्ने र मधेसको मान्छेले आन्दोलन गर्दा घाइते हुनेगरी कुटपिट गरेको उहाँको आरोप छ । उहाँले कबाडीले व्यापार गर्न पनि नपाउने भन्दै प्रश्न पनि गर्नुभयो । बालेनले अदालतको आदेश नमानेको पनि उहाँको आरोप छ । 'पपुलिज्मको नाममा दुनियामा तानाशाही जन्मिएको छ । हिटलर पनि निर्वाचित भएर आएको थियो,' उहाँले प्रश्न गर्नुभयो, 'हिटलरको कारणले जर्मनीको के हाल भयो ? बालेनले पनि नेपाललाई जर्मनी बनाउन खोजेको हो ? पपुलिज्मको आडमा न्याय समाप्त गर्न खोजेको हो ?'
