काठमाडौं । सत्तारुढ नेकपा माओवादी केन्द्रको स्थायी समिति बैठक आज पनि बसिरहेको छ ।
पार्टी केन्द्रीय कार्यालय पेरिसडाँडामा जारी बैठकमा नेताहरुको कार्यविभाजन, पार्टीले सञ्चालन गर्ने जागरण अभियान तथा समसामयिक राजनीतिक अवस्थामाथि छलफल भइरहेको उपाध्यक्ष एवम् प्रवक्ता अग्निप्रसाद सापकोटाले जानकारी दिए ।
यसअघि हिजो बसेको बैठकमा नेताहरुले सत्ता साझेदार नेपाली कांग्रेसको कार्यशैलीको आलोचना गरेका थिए । नेताहरुले कांग्रेस महासमिति बैठकबाट गठबन्धन र सरकारका बारेमा तय गरेको धारणाका बारेमा स्पष्ट जवाफ माग्न पनि प्रधानमन्त्री तथा पार्टी अध्यक्ष पुष्पकमल दाहाललाई सुझाव दिएका थिए । नेताहरुले राष्ट्रियसभाको अध्यक्षमा दाबी नछाड्न पनि नेतृत्वलाई सुझाव दिएको प्रवक्ता सापकोटाले जानकारी दिए ।
