काठमाडौं । नेपाली कांग्रेसले केन्द्रीय सदस्यहरुलाई पार्टीको कामबाट एक महिना छुट्टी दिने प्रस्ताव गरेको छ ।
पार्टी केन्द्रीय कार्यालय सानेपामा मंगलबारदेखि सुरु भएको केन्द्रीय कार्यसमिति बैठकमा सांगठनिक तालिका प्रस्तुत गर्दै महामन्त्री गगन थापाले केन्द्रीय सदस्यहरुलाई असारमा मात्रै पार्टी कामबाट छुट्टी दिने प्रस्ताव पेस गरेका हुन् । उनले अरु ११ महिना नै पार्टी नेता तथा कार्यकर्ताहरु पार्टी काममा लाग्नुपर्ने तालिका पेस गरेका हुन् । ‘असार महिनामा किसानको समय हो । किसानको समस्यामा सहजीकरण गर्ने । समुदायलाई अफ्ठ्यारो परेका बेलामा तयारी हुन्छौं । केन्द्रीय सदस्य साथीहरुले वर्षमा जम्मा एक महिना मात्रै छुट्टी पाउनुहुन्छ । त्योभन्दा बाहेक समय कि उहाँहरु अभियानमा हुनुहुन्छ, कि उहाँहरु विभागमा हुनुहुन्छ । काम गरिरहेको अवस्था बन्छ,’ उनले भने ।
असार महिना किसानको महिना भएको र खेतीको समय भएको भन्दै उनले पार्टी नेता, कार्यकर्ताहरुले असारमा किसानलाई सहयोग गर्नुपर्ने जनाए । त्यस्तै आइपर्न सक्ने प्राकृतिक विपत्हरुको सामना गर्न पार्टीपंक्ति तयारी अवस्थामा रहनुपर्ने उनको भनाइ छ ।
महामन्त्री थापाले भदौ १५ भित्र सबै विभागको गठन गरिसक्ने र पूर्णता दिइसक्ने कार्ययोजना पेस गरेका छन् । त्यस्तै समितिहरुले पनि भदौ १५ गतेसम्ममा पूर्णता पाउने प्रस्ताव छ । आगामी एक वर्षभित्रमा सात लाख नयाँ पार्टी सदस्य बनाउनेगरी घर-घर जाऔं, पार्टी सदस्य बनाऔं अभियान सञ्चालन गरिने पनि उल्लेख छ ।
‘प्रत्येक विभागले आफ्नो कार्यक्षेत्रअन्तर्गतका कार्यक्रम बनाई कार्यतालिकासहितको वार्षिक योजना भदौ मसान्तभित्र केन्द्रीय कार्यसमितिमा पेस गर्ने र विधानको नियमावलीको ४७ (ख) बमोजिम वर्षभरको गतिविधिको प्रगति विवरण ६/६ महिनामा केन्द्रीय कार्यसमितिमा बुझाउनुपर्ने । समितिहरुले पूर्णता पाउन सकेका छैनन् । भाद्र १५ गतेसम्म पूर्णता पाउने प्रस्ताव हो । साउन २० देखि २०८१ असार ३१ गतेसम्म घर घर जाउँ पार्टी सदस्य बनाऔँ भन्ने राष्ट्रिय अभियान सुरु हुने । यसमा कम्तिमा ५ लाखदेखि ७ लाख नयाँ पार्टी सदस्य बनाउने उद्देश्यले यो अभियान सुरु गर्नेछ,’ महामन्त्री थापाको भनाइ छ ।
उनले पार्टीका सबै दस्ताबेजहरु डिजिटलाइज गर्ने र डिजिटल अभिलेख राख्ने प्रस्ताव गरेका छन् । यसका निम्ति कामहरु भइरहेको पनि महामन्त्री थापाले उल्लेख गरेका थिए ।
यो पनि...
पार्टी रुपान्तरणका लागि बुझाइयो २१ बुँदे सुझाव (पूर्ण पाठ)
कांग्रेस केन्द्रीय समिति बैठक आजदेखि, यस्ता छन् मुख्य १० एजेन्डा
