काठमाडौं । प्रधानमन्त्री पुष्पकमल दाहालले आगामी सोमबार प्रतिनिधिसभाबाट विश्वासको मत लिने भएका छन् । प्रधानमन्त्री दाहालले सोमबारको बैठकबाट विश्वासको मत लिने गरी व्यवस्था मिलाउन आग्रह गरेका छन् ।
गत पुस १० गते प्रधानमन्त्रीमा नियुक्त भएको दाहालले २६ गते विश्वासको मत लिएका थिए । त्यसबेला २ सय ६९ सांसदको विश्वास पाएका उनले सरकारबाट नेकपा एमाले र राष्ट्रिय प्रजातन्त्र पार्टी बाहिरिँदै समर्थन फिर्ता लिए पनि पुन: विश्वासको मत लिन लागेका हुन् ।
सरकारमा सहभागी कुनै दलले समर्थन फिर्ता लिएसँगै प्रधानमन्त्रीले पुन: विश्वासको मत लिनुपर्ने संवैधानिक बाध्यता छ । त्यही कारण उनले सोमबार विश्वासको मत लिने तयारी गरेका हुन् ।
राष्ट्रपति र उपराष्ट्रपति निर्वाचनमा एक ठाउँमा उभिएका दलहरुको समर्थन लिएर विश्वासको मत लिने दाहालको योजना छ । विश्वासको मत पाउन १ सय ३८ सांसदको समर्थन जुटाउनुपर्छ ।
