काठमाडौं । राप्रपाको कार्यसम्पादन र संसदीय दलको संयुक्त बैठकले सरकारलाई दिएको समर्थन फिर्ता लिएर सरकारबाट बाहिरीने निर्णय गरेको छ । पार्टी कार्यालय धुम्बाराहीमा बसेको उक्त आकस्मिक बैठकले राप्रपा सरकारबाट बाहिरिने नर्णय गरेको हो ।
बैठकको निर्णयबारै जानकारी दिँदै राप्रपाका अध्यक्ष राजेन्द्र लिङ्देनले भने, 'राष्ट्रियता, विकास, सुशासन र सेवा प्रवाहजस्ता विषयलाई मूल आधार बनाएर सरकार निर्माण गरेका थियौँ र त्यसै पृषठभूमिमा हामी सरकारमा सहभागी भएका थियौँ । त्यही अवस्थामै अब चाहीँ त्यो सहकार्य कायम रहेन ।'
नयाँ बनेको राजनीतिक समीकरणकाबीच आफू सरकारमै रहने या बाहिरिने भन्नेबारे निर्णय गर्न आज बिहान राप्रपाले आकश्मिक बैठक बोलाएको थियो । पार्टीले सरकारबाट बाहिरीने निर्णय गरेसँग राप्रपाका मन्त्रीहरू राजिनामा दिन जाँदै छन् ।
नयाँ राजनीतिक परिस्थिति सृजना भएकाले पार्टीले कसरी अगाडि बढ्ने विषयमा निर्णय लिन बैठक बसेको राष्ट्रिय प्रजातन्त्र पार्टीका प्रवक्ता मोहन श्रेष्ठले बताए । कांग्रेस, माओवादी, एकीकृत समाजवादी पार्टीले आलोपालो सरकार चलाउने सहमति पछि सत्तारुढ राप्रपा छलफलमा जुटेको हो ।