मकवानपुर । वाग्मती प्रदेशका नवनियुक्त मुख्यमन्त्री शालिकराम जमकट्टेलले पद तथा गोपनीयताको शपथ लिएका छन् ।
माओवादी केन्द्रबाट मुख्यमन्त्री बनेका जमकट्टेललाई प्रदेश प्रमुख यादवचन्द्र शर्माले शपथ गराएका हुन् ।
शपथसँगै सानो आकारको मन्त्रिपरिषद् गठन गरिएको छ । प्रदेश मन्त्रीमा नियुक्त जगन्नाथ थपलिया र उद्धव थापाले पनि शपथ लिएका छन् ।
एमाले नेता थपलियाले आर्थिक मामिला तथा योजना मन्त्रालयको जिम्मेवारी पाएका छन् भने राप्रपाका थापालाई कुनै पनि मन्त्रालयको जिम्मेवारी तोकिएको छैन ।
जमकट्टेललाई संविधानको धारा १६८ को उपधारा (२) बमोजिम हिजो प्रदेश प्रमुखले मुख्यमन्त्रीमा नियुक्त गरेका थिए । मुख्यमन्त्री जमकट्टेल ५ दलका ७० सासंदको समर्थनमा मुख्यमन्त्री बनेका हुन् ।
जमकट्टेललाई माओवादी केन्द्रका २१, एमाले २७, राप्रपा १३, नेकपा एस ७ हाम्रो नेपाली पार्टीका २ जना सांसदको साथ छ ।
सत्ता साझेदार दलबीच भएको सहमतिअनुसार माओवादीको भागमा वाग्मती प्रदेश परेपछि उनी मुख्यमन्त्री बनेका हुन् । वाग्मतीमा पाँच वर्षको पूरै कार्यकाल माओवादीले सरकारको नेतृत्व गर्ने सहमति भएको छ ।
