काठमाडौं । फिफा विश्वकप २०२६ अन्तर्गत समूह ए, बी र सीका सबै खेल सकिएसँगै नकआउट चरणको चित्र स्पष्ट हुन थालेको छ । अहिलेसम्म खेल हेर्दा कतै दिग्गज टोलीको दबदबा देखियो भने कतै साना भनिएका टोलीले इतिहास रचे । आज हामी यी तीन समूहका बारेमा चर्चा गर्नेछौं।
फिफा विश्वकप २०२६ अन्तर्गत समूह चरणका पहिलो तीन समूहको खेल सकिँदा नकआउट चरणको स्वरूप स्पष्ट हुन थालेको छ । हालसम्म कतै दिग्गज टोलीको दबदबा देखियो भने कतै साना भनिएका टोलीले इतिहास रचे । सुरुवात गरौं समूह 'ए' बाट । आयोजक मेक्सिकोले घरेलु मैदान 'एज्टेका' स्टेडियमको भरपुर फाईदा उठायो । घरेलु भूमिमा उसले एक गोल पनि नखाई शतप्रतिशत नतिजा निकाल्न सफल रह्यो ।
मेक्सिकोले दक्षिण अफ्रिकालाई २-०, दक्षिण कोरियालाई १-० र चेक रिपब्लिकलाई ३-० ले हराउँदै ९ अंकका साथ समूह विजेता बन्यो । तर यो समूहको सबैभन्दा ठूलो सरप्राइज दक्षिण अफ्रिका बन्यो। अन्तिम खेलमा दक्षिण कोरियालाई १-० ले स्तब्ध पार्दै 'बाफाना बाफाना' इतिहासमै पहिलो पटक विश्वकपको नकआउट चरणमा पुग्न सफल भयो । स्टार खेलाडी सन ह्युङ-मिनलाई सुरुवाती सेटमा नराख्ने दक्षिण कोरियाको निर्णय आत्मघाती सावित भयो । अन्तिम खेलमा थापेलो मासेको दक्षिण अफ्रिकाका लागि नायक बने, जसको गोलले कोरियाको नकआउट सपनामा ब्रेक लगाईदियो । त्यस्तै, समूह 'बी' मा ईतिहास रच्ने टोली बन्यो– क्यानडा । कतारलाई ६-० को फराकिलो अन्तरले हराउँदै क्यानडाले विश्वकप इतिहासमा आफ्नो पहिलो जित मात्र दर्ता गरेन, जोनाथन डेभिडले घरेलु भूमिमा ह्याट्रिक गर्ने विरलै खेलाडीको सूचीमा नाम लेखाए। यद्यपि, समूह विजेता भने स्विट्जरल्याण्ड बन्यो । ट्याक्टिकल रूपमा निकै अनुशासित देखिएको स्विस टोलीले क्यानडालाई २-१ र बोस्नियालाई ४-१ ले हराउँदै ७ अंक जोड्यो । बोस्निया एण्ड हर्जगोभिनाले पनि कतारलाई ३-१ ले हराउँदै ४ अंकका साथ उत्कृष्ट तेस्रो टोलीको रूपमा नकआउटमा स्थान सुरक्षित गर्यो । २०२२ विश्वकप आयोजक कतारका लागि भने यो विश्वकप बिर्सनलायक नै रह्यो, जहाँ उनीहरू -८ को गोल अन्तरका साथ बाहिरिन पुगे ।
यस पटक सबै भन्दा रोचक समूह बन्यो– सी ।
समूह 'सी' मा पाँच पटकको च्याम्पियन ब्राजिल र मोरक्कोबीच शीर्ष स्थानका लागि रोचक भिडन्त देखियो । ब्राजिलले मोरक्कोसँग १-१ को बराबरीबाट यात्रा सुरु गरे पनि हाइटी र स्कटल्याण्डलाई समान ३-० ले पन्छाउँदै गोल अन्तरका आधारमा समूह विजेता बन्यो । भिनिसियस जुनियरले हरेक खेलमा गोल गर्दै आफूलाई गोल्डेन बुटको दौडमा अग्रपङ्तिमा उभ्याएका छन् । स्कटल्याण्डविरुद्धको खेलमा नेयमारको मैदानमा पुनरागमनले ब्राजिलियाली समर्थकमा थप जोस थपेको छ । गत विश्वकपको सेमिफाइनलिस्ट मोरक्कोले पनि आफ्नो लयलाई निरन्तरता दियो । इस्माइल सैबारीको उत्कृष्ट प्रदर्शनको मद्दतले मोरक्कोले हाइटीलाई ४-२ ले हराउँदै नकआउटमा स्थान बनायो । स्कटल्याण्ड र हाइटी भने समूह चरणबाटै बिदा भए, यद्यपि ५२ वर्षपछि फर्किएको हाइटीले मोरक्कोविरुद्ध दुई गोल गरेर आफ्नो उपस्थितिको सम्मान राख्यो ।
यी तीन समूहको तुलना गर्दा मेक्सिको सबैभन्दा सन्तुलित देखिन्छ । दक्षिण अफ्रिकाको पुनरागमन र क्यानडाको आक्रमणले पनि हेर्न लायक नै रह्यो । प्रतियोगिताको अहिलेसम्मकै ठूलो सरप्राइज नै दक्षिण अफ्रिकाको प्रगति हो । यी सबै टोलीका लागि अबको बाटो अझ कठिन छ। मेक्सिकोले नकआउट चरणमा एज्टेकामै तेस्रो स्थानका टोलीमध्ये एकसँग खेल्नेछ, जुन उनीहरूका लागि ठूलो एडभान्टेज पनि हो । त्यस्तै ब्राजिलले समूह 'एफ' को उपविजेतासँग ह्युस्टनमा सामना गर्नेछ । आधिकारिक रूपमा मेक्सिको, दक्षिण अफ्रिका, स्विट्जरल्याण्ड, क्यानडा, ब्राजिल, मोरक्को र बोस्निया एण्ड हर्जगोभिना राउण्ड अफ ३२ मा प्रवेश गरिसकेका छन् ।
अन्त्यमा, विश्वकपले अब वास्तविक दाबेदार र कमजोर टोलीहरूलाई छुट्याउन थालिसकेको छ। नकआउट चरणको 'डु अर डाई' अवस्थामा यी टोलीहरूको रणनीति कस्तो रहला, त्यो हेर्न बाँकी नै छ।
